ციანიდის საქმეზე მტკიცებულებების გასაჯაროებას პროკურატურის მოწმეც კი ითხოვს
დეკანოზ გიორგი მამალაძის დაკავების შემდეგ მისი ადვოკატები მუდმივად მოითხოვენ პროკურატურისგან მოუხსნას მათ გაუთქმელობის ვალდებულება საქმეზე, რომელსაც საიდუმლო გრიფი არ ადევს. ამჯერად კი მტკიცებულებების გასაჯაროებას პროკურატურის მოწმე ითხოვს ამავე საქმეში.
დეკანოზ გიორგი მამალაძის საქმეში მთავარი მოწმე ირაკლი მამალაძეა, რომელმაც ფარულად მოახდინა გარკვეული მასალების აუდიოვიდეო ჩაწერა, თუმცა უცნობია რა შინაარსისაა ეს მასალები. ირაკლი მამალაძე ამბობს:
“ეს იყო მკვლელობის მომზადება და ეს პროცესი არის ასახული ამ ჩანაწერებში. ცალსახად უკავშირდება პატრიარქს და შესაძლოა მის გარემოცვასაც”. მისი თქმით, დღეს ყველამ უნდა მოითხოვოს პროკურატურისგან ამ ჩანაწერების გასაჯაროება.
ადვოკატებისთვის გაუთქმელობის ხელწერილების გაუქმებას ითხოვენ პროკურატურისგან სახალხო დამცველი, უფლებადამცველი ორგანიზაციების, საპარლამენტო ოპოზიციის წარმომადგენლები, რასაც არ აკმაყოფილებს ჯერ პროკურატურა.
- დეკანოზი გიორგი მამალაძე მკვლელობის მომზადების ბრალდებით პროკურატურამ 2017 წლის 10 თებერვალს დააკავა. ამის შესახებ საჯაროდ საქართველოს მთავარმა პროკურორმა ირაკლი შოთაძემ 13 თებერვალს განაცხადა, მას შემდეგ რაც ინფორმაცია რუსთავი 2-მა გაავრცელა.
- „ნატრიუმის ციანიდი“- პროკურატურის მტკიცებით, ჩხრეკისას დეკანოზის ბარგიდან ეს ნივთიერა ამოიღეს. მამალაძე თბილისის აეროპორტში დააკავეს, საიდანაც ის პროკურატურის თქმით, ბერლინში მიფრინავდა.
- გენერალურმა პროკურორმა 13 თებერვალს განაცხადა, რომ გამოძიებას მოქალაქემ შეატყობინა ამის შესახებ. “მოქალაქის თქმით, გიორგი მამალაძეს სჭირდებოდა ციანიდი, რათა “მოეხდინა მაღალი იერარქიის სასულიერო პირის სიცოცხლის ხელყოფა”.
- 13 თებერვალს პროკურატურმა ასევე გაავრცელა ცნობა, რომელშიც ნათქვამია: “როგორც გაირკვა გ.მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ მის თანმხლებ პირებთან ერთად და მას შხამიანი ნივთიერება სჭირდებოდა გამგზავრებამდე”.