კლინიკის დირექტორი: დეკანოზი მამალაძე გონების კარგვის დიაგნოზით შემოიყვანეს
მკვლელობის მომზადების ბრალდებით დაკავებული დეკანოზი გიორგი მამალაძე საავადმყოფოში გონების კარგვის დიაგნოზით შეიყვანეს.
ამის შესახებ ჟურნალისტებს ჩაფიძის კარდიოლოგიური კლინიკის დირექტორმა ზაზა ლაზარაშვილმა განუცხადა.
მისი თქმით, დეკანოზი საავადმყოფოში 17 თებერვალს, 20.00 საათზე შეიყვანეს.
“შემოიყვანეს გონების კარგვის დიაგნოზით. მისივე [დეკანოზ გიორგის] მონათხრობით, ბოლო რამდენიმე წლის განმავლობაში ეს არ არის მისთვის პირველი შემთხვევა [გონების კარგვა]”, – განაცხადა ზაზა ლაზარაშვილმა 18 თებერვალს და დასძინა, რომ ამჟამად დეკანოზის ჯანმრთელობის მდგომარეობა სტაბილურია და მის სოცხოცხლეს საფრთხე არ ემუქრება.
კლინიკის დირექტორის თქმით გიორგი მამალაძეს სხვადასხვა, “პროტოკოლით გათვალისწინებული” კვლევები ჩაუტარდება.
დეკანოზი სასჯელაღსრულების დაწესებულებიდან საავადმყოფოში ისე გადაიყვანეს, რომ ამის შესახებ ადვოკატი ინფორმირებული არ იყო. ადვოკატმა 17 თებერვალს განაცხადა, რომ დეკანოზ გიორგი მამალაძეს მაღალი სიცხე და წნევა ჰქონდა.
რა ვიცით აქამდე?
[checklist]
- დეკანოზი გიორგი მამალაძე მკვლელობის მომზადების ბრალდებით პროკურატურამ 2017 წლის 10 თებერვალს დააკავა. ამის შესახებ საჯაროდ საქართველოს მთავარმა პროკურორმა ირაკლი შოთაძემ 13 თებერვალს განაცხადა, მას შემდეგ რაც ინფორმაცია რუსთავი 2-მა გაავრცელა.
- „ნატრიუმის ციანიდი“- პროკურატურის მტკიცებით, ჩხრეკისას დეკანოზის ბარგიდან ეს ნივთიერა ამოიღეს. მამალაძე თბილისის აეროპორტში დააკავეს, საიდანაც ის პროკურატურის თქმით, ბერლინში მიფრინავდა.
- გენერალურმა პროკურორმა 13 თებერვალს განაცხადა, რომ გამოძიებას მოქალაქემ შეატყობინა ამის შესახებ. “მოქალაქის თქმით, გიორგი მამალაძეს სჭირდებოდა ციანიდი, რათა “მოეხდინა მაღალი იერარქიის სასულიერო პირის სიცოცხლის ხელყოფა”.
- 13 თებერვალს პროკურატურმა ასევე გაავრცელა ცნობა, რომელშიც ნათქვამია: “როგორც გაირკვა გ.მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ მის თანმხლებ პირებთან ერთად და მას შხამიანი ნივთიერება სჭირდებოდა გამგზავრებამდე”.
[/checklist]