საქართველოს ოფიციალური ვიზიტით საფრანგეთის რესპუბლიკის თავდაცვის მინისტრი, ჟან-ივ ლე დრიანი ეწვია, რომელსაც ლევან იზორია მასპინძლობს.

თავდაცვის სამინისტროში გაიმართა მინისტრების შეხვედრა, რომელსაც საქართველოს თავდაცვის მინისტრის პირველი მოადგილე ლელა ჩიქოვანი, გენერალური შტაბის უფროსი, გენერალ-მაიორი ვახტანგ კაპანაძე და უწყების სხვა წარმომადგენლები დაესწრნენ. ფრანგულ მხარეს კი საფრანგეთის ელჩი საქართველოში პასკალ მენიე და თავდაცვის ატაშე, ვიცე-პოლკოვნიკი ოლივიე მადიოტი წარმოადგენდნენ.

როგორც ამ შეხვედრის შემდეგ გახდა ცნობილი, საუბარი შეეხო საჰაერო თავდაცვის სფეროში თანამშრომლობასაც:

“განსაკუთრებით მინდა აღვნიშნო ის მხარდაჭერა, რომელსაც საფრაგეთის მხარე ნატო-საქართველოს მხარდაჭერის ფარგლებში იჩენს. საუბარია ნატო-საქართველოს არსებით პაკეტზე და მის ერთ-ერთ მნიშვნელოვან ინიციატივაზე, კერძოდ, საჰაერო თავდაცვის სფეროში. ბატონმა მინისტრმა ბრძანა, რომ ამ მიმართულებით გაძლიერდება თანამშრომლობა. წლის ბოლოს ექსპერტიც იქნება მოვლენილი, რათა დაიგეგმოს, კონკრეტულად თუ რა ფორმას მიიღებს და რა ეტაპები იქნება მომავლისთვის იდენტიფიცირებული ამ თანამშრომლობისთვის,”- განაცხადა ლევან იზორიამ შეხვედრის დასრულების შემდეგ გამართულ ერთობლივ ბრიფინგზე.

თავდაცვის სამინისტროს ცნობით, განსაკუთრებით აღინიშნა სამხედრო განათლების მიმართულება: ლევან იზორიამ ყურადღება გაამახვილა საფრანგეთის წვლილზე საჩხერის სამთო მომზადების სკოლის დაარსებასა და განვითარებაში. იზორიამ ფრანგ კოლეგას სკოლისთვის გაწეული მატერიალურ-ტექნიკური დახმარებისთვის მადლობა გადაუხადა.