ბურჭულაძის პარტიის ოფისში მოლაპარაკება მიმდინარეობს ვაშაძე, გირჩი, მემარჯვენეების ბლოკთან

პარტია “სახელმწიფო ხალხისთვის” ოფისში მოლაპარაკებები მიმდინარეობს საარჩევნო ბლოკის შექმნაზე მანამდე შექმნილ ბლოკთან “ახალი არჩევანი”, რომელშიც ახალი მემარჯვენეები, ვაშაძის პარტია და გირჩი არიან გაერთიანებული.

ამის შესახებ 18 აგვისტოს პარტიის ოფისში მისულმა ახალი მემარჯვენეების წევრმა მამუკა კაციტაძემ განუცხადა  ჟურნალისტებს.

17 აგვისტოს საღამოს საარჩევნო ბლოკ “ახალი არჩევანის” ლიდერებმა საარჩევნო ბლოკის შექმნა საჯაროდ შესთავაზეს პაატა ბურჭულაძის პარტიას.

როგორც მამუკა კაციტაძე ამბობს, გუშინ გაცხადებული შეთავაზების შემდეგ პარტიებს შორის კომუნიკაცია მალევე შედგა და დღევანდელი შეხვედრის შესახებ შეთანხმდნენ.

“დღეს გვაქვს შეხვედრა, სადაც ალბათ უნდა ვისაუბროთ ბევრ მნიშვნელოვან თემაზე.  გადაწყვეტილება დღის განმავლობაში გახდება ცნობილი. გაერთიანების მიზანი არის ის, რომ უნდა მოხდეს ძალისხმევების კონსოლიდაცია, რათა სერიოზული შედეგი დავდოთ 2016 წლის საპარლამენტო არჩევნებში”.

საარჩევნო ბლოკ “ახალი არჩევანის” ლიდერებმა ბურჭულაძის პარტიას “სახელწიფო ხალხისთვის”  საჯარო შეთავაზება ერთიანი საარჩევნო ბლოკის შექმნის შესახებ 17 აგვისტოს საღამოს გაუკეთეს, თუმცა მოლაპარაკებები მანამდეც მიმდინარეობდა.  17 აგვისტოს ბურჭულაძის პარტია რამდენიმე წევრმა დატოვა. ერთ-ერთმა მათგანმა იოსებ ხიმშიაშვილმა გუშინ ნეტგაზეთს განუცხადა, რომ მისი გადაწყვეტილების მიზეზი 2-თვიანი უხელფასობა და ბურჭულაძის პარტიის მხრიდან ენმ-სთან, გიორგი ვაშაძესთან და “გირჩთან” მოლაპარაკებები გახდა. ეს განცხადება მან “ახალი არჩევანის” ლიდერების განცხადებამდე გააკეთა.

[checklist]

• 2016 წლის 5 აგვისტოს “გირჩი”, “ახალი საქართველო” და “ახალი მემარჯვენეები” 2016 წლის საპარლამენტო არჩევნებისთვის  გაერთიანდნენ და საარჩევნო ბლოკი “ახალი არჩევანი” შექმნეს;
• ნაციონალური მოძრაობის ერთ-ერთმა ლიდერმა გიორგი ვაშაძემ 2016 წლის მაისში დატოვა პარტია ენმ და  5 ივნისს პოლიტიკური პლატფორმა “ახალი საქართველო” დააარსა;
• 2015 წლის მაისში ნაციონალური მოძრაობა დატოვეს დეპუტატებმა- ზურაბ ჯაფარიძემ, პავლე კუბლაშვილმა, გოგა ხაჩიძემ და გიორგი მელაძემ და  პოლიტიკური გაერთიანება  “გირჩი” დააარსეს;
• ცნობილმა საოპერო მომღერალმა პაატა ბურჭულაძემ 2016 წლის 28 მაისს დააფუძნა პარტია “სახემლმწიფო ხალხისთვის”.
• ბლოკში გაერთიანებული ყველაზე ძველი პარტია არის “ახალი მემარჯვენეები” — მემარჯვენე-ცენტრისტული პარტია, რომელიც 2000 წელს ფრაქციის სახით შეიქმნა საქართველოს პარლამენტში. 2001 წელს “ახალი ფრაქციის”, “ახალი მოძრაობისა” და “ახალი კონსერვატორების” ბაზაზე შეიქმნა პოლიტიკური გაერთიანება “ახალი მემარჯვენეები”, რომლის თავმჯდომარედაც ლევან გაჩეჩილაძე აირჩიეს, თანათავმჯდომარედ — დავით გამყრელიძე. 2012 წლის საპარლამენტო არჩევნებში “ახალმა მემარჯვენეებმა” ხმათა 1%-იც ვერ დააგროვა, რის გამოც პარტია დატოვა ლიდერმა – დავით გამყრელიძემ. 2013 წლის იანვრიდან პარტიის თავმჯდომარე იყო ფიქრია ჩიხრაძე – ამჟამად საქართველოს პრეზიდენტის მრჩეველი. 2015 წლის ოქტომბერში კი “ახალი მემარჯვენეების” თავმჯდომარედ მამუკა კაციტაძე აირჩიეს.

[/checklist]