“კოალიციაში სადავო საკითხები არ არსებობს, გარდა იმ საკითხისა, რომელიც უკავშირდება ქვეყნის პოლიტიკურ მოწყობას. ძალიან მალე გამოქვეყნდება ჩვენი კოალიციის პოლიტიკური მანიფესტი.
მინდა გითხრათ, რომ არის საკითხები (მაგალითად, ქვეყნის მმართველობის მოწყობა), რომელიც მხოლოდ რეფერენდუმზე ქართული საზოგადოების მიერ იქნება გადაწყვეტილი. ჩვენ ვთანხმდებით პრინციპულ, ფუნდამენტურ საკითხებზე, როგორი უნდა იყოს სამართლიანი სასამართლო, ეკონომიკური და სოფლის მეურნეობის განვითარების ფორმები, როგორ აღმოვფხვრით უმუშევრობას, სიღატაკეს, ამაში გვაქვს თანხმობა,” – აღნიშნა ალასანიამ ბიძინა ივანიშვილის პოლიტიკური პარტიის საინიციატივო ჯგუფის შეხვედრაზე.
შეგახსენებთ, ერთ–ერთ პრესკონფერენციაზე კოალიციის წევრმა გუბაზ სანიკიძემ განაცხადა, რომ კოალიციაში შეუთანხმებლობაა მმართველობის მოდელზე. მისი თქმით, ირაკლი ალასანიას საპრეზიდენტო მმართველობა სურს, „ეროვნულ ფორუმსა“ და „რესპუბლიკელებს“ კი – ქვეყნის მართვის საპარლანეტო მმართველობა.