ამ წუთებში თბილისის საქალაქო სასამართლოში მიმდინარეობს დღეს, პარლამენტის წინ გამართული აქციის დროს დაკავებულთა პროცესი.
მოსამართლე კობა გოცირიძის გადაწყვეტილებით, ერთ–ერთ დაკავებულს, ილია წურწუმიას, დაეკისრა ფულადი ჯარიმა – 400 ლარის ოდენობით. მოსამართლის თანაშემწის ცნობით, ამ დროისთვის მიმდინარეობს სხვა დაკავებულების პროცესი.
დაკავებულნი არიან აქციის მონაწილეები: ზაზა სვანაძე, ჯაბა ჯიშკარიანი, მიშა მუმლაძე, დავით ფაცაცია, ირაკლი ბერაია და კობა ცერცვაძე.
ისინი გირგვლიანის მკვლელობიდან 6 წლისთავისადმი მიძღვნილ აქციაზე, რომელიც პარლამენტთან “წინააღმდეგობის მოძრაობის” ორგანიზებით გაიმართა, დააკავეს. სამართალდამცველებმა აქციის მონაწილეები მას შემდეგ დააკავეს, რაც რუსთაველის გამზირის სავალ ნაწილზე გადასვლა სცადეს.
დაკავებულებს ბრალად ედებათ ადმინისტრაციულ სამართალდარღვევათა კოდექსის 166-ე მუხლის (წვრილმანი ხულიგნობა, საზოგადოებრივი წესრიგის დარღვევა) და 173-ე მუხლის (პოლიციის მოთხოვნის დაუმორჩილებლობა) დარღვევა. აღნიშნული მუხლები ჯარიმას ან ადმინისტრაციულ პატიმრობას ითვალისწინებს.
ამავე თემაზე:
აქციის დროს დაკავებულთა საქმეს დღესვე განიხილავს სასამართლო
გირგვლიანის მკვლელობის გამო გამართულ აქციაზე რამდენიმე ადამიანი დააკავეს