ბიძინა ივანიშვილი: რა თქმა უნდა მე ტრადიციულ ოჯახებს ვუჭერ მხარს
ყოფილი პრემიერ-მინისტრი ბიძინა ივანიშვილი აცხადებს, რომ მხარს უჭერს რეფერენდუმის გამართვას საკონსტიტუციო ცვლილებებზე, რომელმაც უნდა განსაზღვროს, რომ ქორწინება ქალისა და მამაკაცის ნებაყოფლობთი კავშირია, თუმცა, ამავე დროს, ღია კარის მტვრევას უწოდებს.
“უჭერთ თუ არა მხარს, რომ საპარლამენტო არჩევნებთან ერთად გაიმართოს რეფერენდუმი საკონსტიტუციო ცვლილებებზე, რომლის მიხედვითაც კონსტიტუციაში ჩაიწერება, რომ ქორწინება ქალისა და მამაკაცის ნებაყოფლობითი კავშირია”, – ასე დასმულ კითხვაზე ივანიშვილმა უპასუხა:
“მოკლედ, კი, და ზოგადად, ღია კარებს ვამტვრევთ. ისედაც ეს კანონში არ არის დაშვებული და, მე მგონი, ცოტა ზედმეტი აჟიოტაჟი ავწიეთ. რა თქმა უნდა, მე ტრადიციულ ოჯახებს ვუჭერ მხარს, თუმცა ანტიდისკიმინაციული კანონი რაც მივიღეთ, მე ძალიან აქტიური ვიყავი და ძალიან მხარდამჭერი. ეს გავითვალისწინოთ ძალიან კარგად”.
ივანიშვილმა ქორწინების საკითხებზე ჟურნალისტის კითხვას 2016 წლის 14 ივნისს გამართულ პრესკონფერენციაზე უპასუხა.
საუბარია სამოქალაქო ქორწინებასთან დაკავშირებით სარეფერენდუმო შეკითხვაზე, რომელიც ცენტრალურმა საარჩევნო კომისიამ 12 ივნისს დაარეგისტრირა.
“თანახმა ხართ თუ არა, რომ სამოქალაქო ქორწინება განისაზღვროს, როგორც ოჯახის შექმნის მიზნით კავშირი მამაკაცსა და ქალს შორის” – ამ შეკითხვაზე პასუხის გაცემა საქართველოს მოქალაქეებს 8 ოქტომბერს იმ შემთხვევაში მოუხდებათ, თუ რეფერენდუმის საინიციატივო ჯგუფი 200 000 ხელმოწერას შეაგროვებს და რეფერენდუმის ჩატარებას საქართველოს პრეზიდენტი და პრემიერ-მინისტრი მხარს დაუჭერენ.
რეფერენდუმის ერთ-ერთი ინიციატორი, დიასპორის საკითხებში სახელმწიფო მინისტრის ყოფილი მოადგილე სანდრო ბრეგვაძეა. ის აცხადებს, რომ რეფერენდუმის ჩატარების შემთხვევაში საბოლოოდ გაეცემა ამ კითხვას პასუხი და საკითხის გარშემო დისკუსია შეწყდება.
ქორწინების კონსტიტუციაში განსაზღვრის საკითხზე პარლამენტშიც მსჯელობენ. “ქართულ ოცნების” მიერ მომზადებულ საკონსტიტუციო ცვლილების კანონპროექტი რომლის მიხედვით, “ქორწინება, ოჯახის შექმნის მიზნით ქალისა და მამაკაცის ნებაყოფლობითი კავშირია”, პარლამენტმა გასულ კვირას განიხილა. უცნობია, როდის უყრიან საკითხს კენჭრს, რადგან კენჭისყრაზე დასაყენებლად სხდომათა დარბაზში დეპუტატთა საკმარისი რაოდენობა არ იკრიბება.
მნიშვნელოვანი დეტალები:
- საქართველოს კონსტიტუციის 36-ე მუხლის პირველი პუნქტის მიხედვით, ქორწინება ემყარება მეუღლეთა უფლებრივ თანასწორობასა და ნებაყოფლობას.
- 2012 წლის საქართველოს საპრეზიდენტო არჩევნების წინ ქრისტიანულ-დემოკრატიულმა მოძრაობამ მოამზადა საკონსტიტუციო ცვლილებების პროექტი, რომელიც ითვალისწინებდა კონსტიტუციის 36-ე მუხლის ცვლილებას შემდეგი რედაქციით: “სახელმწიფო აღიარებს მამაკაცისა და ქალის ქორწინებას, რომელიც ემყარება მეუღლეთა უფლებრივ თანასწორობასა და ნებაყოფლობას.“ ქდმ-მ ამ ინიციატივის მხარდასაჭერად მაშინ ხელმოწერების შეგროვება დაიწყო. ეს ინიციატივა ასევე გახდა ჰომოფობიაზე დისკუსიის საფუძველი.
- 2014 წელს მაშინდელი პრემიერ-მინისტრი ირაკლი ღარიბაშვილი გამოვიდა ინიციატივით, კონსტიტუციაში შეეტანათ ჩანაწერი, რომ “ოჯახი არის ქალისა და მამაკაცის ერთობა” [სავარაუდოდ მას მხედველობაში ჰქონდა ქორწინება, რადგანაც “ოჯახი” საერთოდ არ გვხდება კონსტიტუციაში”. მაშინ ღარიბაშვილმა განაცხადა, რომ ოჯახის დეფინიციის კონსტიტუციით გამყარების ინიციატივა განხილული და მოწონებულია კოალიცია „ქართული ოცნების“ პოლიტსაბჭოს მიერ.
- 2016 წლის 27 იანვარს მოქალაქე გიორგი ტატიშვილმა საქართველოს საკონსტიტუციო სასამართლოს მიმართა საქართველოს სამოქალაქო კოდექსის იმ ნორმის არაკონსტიტუციურად ცნობის შესახებ, რომელიც ქორწინებას მხოლოდ ქალსა და კაცს შორის აღიარებს.
- 2016 წლის 7 თებერვალს საქართველოს მართლმადიდებელმა ეკლესიამ მიმართა შინაგან საქმეთა მინისტრს გიორგი ტატიშვილისთვის დაცვის გამოყოფის თხოვნით. ეკლესიამ განაცხადა, რომ ტატიშვილი არის ლგბტ საზოგადოების წარმომადგენელი და რადგანაც მოსახლეობის უდიდესი ნაწილი უარყოფითად არის განწყობილი “ასეთ კანონთან მიმართებაში”, არის საშიშროება, რომ გარკვეული ძალების მიერ ეს მდგომარეობა იქნას გამოყენებული პროვოცირებისათვის და გიორგი ტატიშვილის სიცოცხლეს საფრთხე შეექმნას. შსს სამინისტრო არ ავრცელებს ინფორმაციას, გამოუყვეს თუ არა დაცვა გიორგი ტატიშვილს საპატრიარქოს თხოვნის საფუძველზე;
- 2016 წლის 8 თებერვალს ლგბტ ორგანიზაციები ქორწინების თანასწორობასთან დაკავშირებით გიორგი ტატიშვილის ინიციატივას გაემიჯნენ და განაცხადეს, რომ გიორგი ტატიშვილს არ ჰქონია ლგბტ თემთან საკანონმდებლო ინიციატივაზე დისკუსია და იგი მოქმედებს არა ლგბტ ადამიანების, არამედ საკუთარი სახელით. მათი აზრით, ინიციატივა ქორწინების დეფინიციასთან დაკავშირებით პროვოკაციულია და ლგბტ ადამიანების უფლებების არა დაცვისკენ, არამედ მათი დაზარალებისკენ არის მიმართული.
- 2016 წლის 11 თებერვალს გია ვოლსკიმ განაცხადა, რომ საპარლამენტო უმრავლესობას მზად აქვს კანონპროექტი, რომლის მიხედვითაც კონსტიტუციაში გადავა ქორწინების ის დეფინიცია, რაც საქართველოს სამოქალაქო კოდექსშია. ვოლსკიმ ასევე განაცხადა, რომ თუ მმართველი პოლიტიკური გუნდი ვერ მოახერხებს საკონსტიტუციო ცვლილებებს ხმათა არასაკმარისი რაოდენობის გამო, საკითხი რეფერენდუმზე გავა.