საქართველოში ნარკოპოლიტიკის ეროვნული პლატფორმა დაფუძნდა

ნარკოტიკების მომხმარებელთა საქართველოს ქსელის ინიციატივით, საქართველოში ნარკოპოლიტიკის ეროვნული პლატფორმა დაფუძნდა.

ორგანიზატორებმა პლატფორმის შექმნის მიზნებსა და სამომავლო გეგმებზე  27 აპრილს თბილისში პრესკონფერენცია გამართეს.

ორგანიზატორები აცხადებენ, რომ  საქართველოს ნარკოპოლიტიკის ეროვნული პლატფორმა  საქართველოში არსებული რეპრესიული ნარკოპოლიტიკით გამოწვეული ნეგატიური შედეგების შესამსუბუქებლად შეიქმნა და მათი მიზანი ნარკოტიკების მომხმარებლებზე ორიენტირებული ჯანდაცვისა და სოციალური პროგრამების ეფექტურობის უზრუნველყოფაა.

მათი განცხადებით, პლატფორმა ხელს შეუწყობს სამოქალაქო საზოგადოების, სათემო ჯგუფების და ექსპერტების ჩართულობას ნარკოტიკებთან დაკავშირებული პოლიტიკის ფორმირებაში და ადვოკატირებას გაუწევს ეფექტური და ჰუმანური პოლიტიკის ჩამოყალიბებას.

საქართველოს ნარკოპოლიტიკის ეროვნულ პლატფორმაში 33 არასამთავრობო ორგანიზაცია და მოძრაობაა გაწევრიანებული.

ორგანიზატორები აცხადებენ, რომ პლატფორმის საქმიანობის ძირითადი მიმართულებები იქნება ეს და სხვა საკითხები:

• ყველა სახის ნარკოტიკის მოხმარებისთვის სისხლის სამართლებრივი პასუხისმგებლობის გაუქმება;
• საკუთარი მოხმარების მიზნით მცენარეების კულტივირებასთან დაკავშირებული კანონმდებლობის გადახედვა;
• მცირე ოდენობის შეძენა/შენახვისთვის სისხლის სამართლებრივი პასუხისმგებლობის გაუქმება;
• ნარკოტიკების მოხმარებისთვის და მცირე ოდენობით პირადი მოხმარებისთვის შეძენა/შენახვისთვის ადმინისტრაციული პასუხისმგებლობის გაუქმება (გარდა მოხმარების პროცესისა საზოგადოებრივი თავშეყრის ადგილებში, ან არაფხიზელ მდგომარეობაში ავტოსატრანსპორტო საშუალების მართვისა);
• ნარკოტიკების მომხმარებლებისათვის ხარისხიან სერვისებზე ხელმისაწვდომობის უზრუნველყოფა:

•  საზოგადოების ინფორმირებულობის დონის ამაღლება ნარკოტიკების მოხმარების საკითხებზე ნარკოტიკების მომხმარებლების მიმართ სტიგმა/დისკრიმინაციის შესამცირებლად

ხელმოწერები საქართველოს ნარკოპოლიტიკის ეროვნული პლატფორმის ბანერზე. 27.04.2016. ფოტო: ნეტგაზეთი