რუსეთის წინააღმდეგ დაწესებული სანქციები – სრული სია

რუსეთის უკრაინაში შეჭრის საპასუხოდ აშშ-მა, გაერთიანებულმა სამეფომ და ევროკავშირმა დააწესეს სანქციები. კერძოდ, უნდა გაიყინოს ვლადიმერ პუტინის და მასთან დაახლოებული პირების აქტივები და სხვა ყველაფერთან ერთად, SWIFT-ის სისტემიდან გაითიშოს წამყვანი რუსული ბანკები. სანქციები დააწესეს კანადამ, იაპონიამ, ავსტრალიამ და სამხრეთ კორეამაც.

გამოცემა „ფაინენშლ თაიმზი“ აქვეყნებს ყველაზე მნიშვნელოვანი სანქციების ჩამონათვალს:

პოლიტიკოსები, ჩინოვნიკები, ოლიგარქები

• გაიყინება პრეზიდენტ ვლადიმერ პუტინის აქტივები აშშ-ში, ევროკავშირსა და გაერთიანებულ სამეფოში. ამ ტერიტორიებზე მოგზაურობა მას არ ეკრძალება. აქტივების გაყინვის მიზეზი მის მიერ დონეცკისა და ლუგანსკის აღიარება და უკრაინაში სრულმასშტაბიანი შეჭრაა;
• გაიყინება რუსეთის საგარეო საქმეთა მინისტრის, სერგეი ლავროვის აქტივები აშშ-ში, ევროკავშირსა და გაერთიანებულ სამეფოში „უკრაინის ტერიტორიული მთლიანობის, სუვერენიტეტის, სტაბილურობისა და უსაფრთხოების ძირის გამომთხრელი ქმედებების აქტიურად მხარდაჭერისთვის“. მოგზაურობა არც მას ეკრძალება;
• სერგეი შოიგუს (რუსეთის თავდაცვის მინისტრი) და ალექსანდრე ბორტნიკოვს (უშიშროების ფედერალური სამსახურის – ფსბ-ს დირექტორი) გაეყინებათ აქტივები აშშ-სა და ევროკავშირში და აეკრძალებათ ამ იურისდიქციებში მოგზაურობა;
• ვალერი გერასიმოვს (რუსეთის შეიარაღებული ძალების გენერალური შტაბის ხელმძღვანელი) აეკრძალება მოგზაურობა აშშ-სა და გაერთიანებულ სამეფოში, გაიყინება მისი აქტივებიც. 2014 წელს გერასიმოვს სანქციები დაუწესა ევროკავშირმა;
• ევროკავშირი სანქციებს უწესებს სახელმწიფო დუმის 351 დეპუტატს – მათ გაეყინებათ ანგარიშები და აეკრძალებათ მოგზაურობა. გაერთიანებული სამეფო ასეთ სანქციებს უწესებს დუმის და ფედერაციის სათათბიროს მხოლოდ იმ წევრებს, რომლებმაც მხარი დაუჭირეს ლუგანსკის და დონეცკის აღიარებას. აშშ-მა აქამდე სანქციები დაუწესა მხოლოდ დუმის სპიკერს, ვიაჩესლავ ვოლოდინს;
• აშშ და ევროკავშირი აქტივებს გაუყინავენ და მოგზაურობას აუკრძალავენ რუსეთის უშიშროების საბჭოს ყველა წევრს;
• აქტივები გაეყინებათ და მოგზაურობა აეკრძალებათ ბელარუსის ხელისუფლების წარმომადგენლებს, რუსეთის უკრაინაში შეჭრის მხარდაჭერისთვის;
• კირილ შამალოვს, რუსეთის ყველაზე ახალგაზრდა მილიარდერს და პუტინის შვილის, კატარინას ყოფილ მეუღლეს გაეყინება აქტივები და აეკრძალება მოგზაურობა გაერთიანებულ სამეფოში;
• პიოტრ ფრადკოვს, ყოფილი პრემიერ-მინისტრის, მიხაილ ფრადკოვის შვილსა და „პრომსვიაზბანკის“ დირექტორს, გაეყინება აქტივები და აეკრძალება მოგზაურობა გაერთიანებულ სამეფოში;
• დენის ბორტნიკოვს, „ვი-თი-ბი“ ბანკის ვიცე-პრეზიდენტს და უშიშროების ფედერალური სამსახურის დირექტორის შვილს, გაეყინება აქტივები და აეკრძალება მოგზაურობა აშშ-ში, ევროკავშირსა და გაერთიანებულ სამეფოში;
• იური სლუსარს, „გაერთიანებული ავიასამშენებლო კორპორაციის“ დირექტორს, და ელენა გიორგიევას, „ნოვიკომბანკის“ სამეთვალყურეო საბჭოს თავმჯდომარეს, ეკრძალებათ გაერთიანებულ სამეფოში მოგზაურობა;
• გენადი ტიმჩენკოს, რუსეთის მეექვსე ყველაზე მდიდარ ოლიგარქს და საინვესტიციო კომპანიის, „ვოლგა გრუპის“ მფლობელს, გაეყინება აქტივები და აეკრძალება მოგზაურობა გაერთიანებულ სამეფოში;
• გაერთიანებული სამეფო სანქციებს დაუწესებს ოლიგარქ ბორის როტენბერგს და მის დის/ძმისშვილს, იგორ როტენბერგს;
• ევროკავშირში აქტივები გაეყინებათ და მოგზაურობა აეკრძალებათ ვიოლეტა პრიგოჟინას და ლიუბ პრიგოჟინას – ევგენი პრიგოჟინის დედას და მეუღლეს. ევგენი პრიგოჟინმა, ევროკავშირის განცხადებით, კერძო სამხედრო კომპანიის, „ვაგნერის“ ჯარისკაცები უკრაინაში გაგზავნა.
• სერგეი ივანოვს (თავდაცვის ყოფილი მინისტრი, პუტინთან დაახლოებული პირი) და მის შვილს, ასევე სერგეი ივანოვს („გაზპრომბანკის“ სამეთვალყურეო საბჭოს წევრს) აშშ სანქციებს დაუწესებს;
• აშშ-ის სანქციები ასევე შეეხებათ ნიკოლაი პატრუშევს (რუსეთის უშიშროების საბჭოს მდივანი) და მის შვილს, ანდრეი პატრუშევს („გაზპრომ ნეფტის“ ყოფილი დირექტორი);
• აშშ-ის სანქციები ასევე შეეხებათ იგორ სეჩინს („როსნეფტის“ ხელმძღვანელი) და მის შვილ ივან სეჩინს;
• აშშ სანქციებს უწესებს რუსეთის სახელმწიფო ბანკების ტოპ-მენეჯმენტის წარმომადგენლებს: ალექსანდრ ვედიახინს („სბერბანკი“), ანდრეი პუჩკოვს, იური სოლოვიოვს („ვი-თი-ბი“) და მის მეუღლეს, გალინა ულიუტინას;

ბანკები

• რუსეთის ცენტრალური ბანკი: ევროკავშირს უკვე აკრძალული აქვს „პირდაპირი ან არაპირდაპირი ვაჭრობა საინვესტიციო მომსახურებაში… 2022 წლის 12 აპრილის შემდეგ გამოშვებული ფასიანი ქაღალდებისთვის და საბაზრო ინსტრუმენტებისთვის“. ამასთან ერთად, აშშ-ს, გაერთიანებულ სამეფოს, კანადასა და ევროკავშირს სურთ, „დააწესონ შემზღუდავი ზომები, რომლებიც არ მისცემს რუსეთის ცენტრალურ ბანკს საშუალებას, გამოიყენოს საერთაშორისო რეზერვები ისე, რომ ძირი გამოუთხაროს სანქციების შედეგებს“;
• SWIFT: აშშ-ის, გაერთიაენებული სამეფოს, კანადასა და ევროკავშირის განცხადებით, რიგ რუსულ ბანკებს გათიშავენ SWIFT-ის სისტემიდან, რათა „უზრუნველყონ, რომ ეს ბანკები გამორთნულნი არიან საერთაშორისო ფინანსური სისტემიდან და ზიანი მიაყენონ მათ შესაძლებლობას, გლობალური ოპერაციები ჩაატარონ“. კონკრეტულად რომელ ბანკებს შეეხება ეს სანქცია, ამ ეტაპზე უცნობია;
• „სბერბანკი“: რუსეთის უმსხვილეს ბანკს და მისი შვილობილ კომპანიებს შეეზღუდათ წვდომა აშშ-ის ფინანსურ სისტემაზე და აეკრძალათ დოლარში ტრანზაქციების განოხირცელება;
• „ვი-თი-ბი“: აშშ-მა და გაერთიანებულმა სამეფომ გაყინეს რუსეთის მეორე უმსხვილესი ბანკის აქტივები, რომელიც მნიშვნელოვნადაა დამოკიდებული დასავლეთის ფინანსურ სისტემაზე. ბანკი და მისი შვილობილი კომპანიები აშშ-ის და გაერთიანებული სამეფოს მოქალაქეებთან საქმიანობას ვერ წარმართავენ;
• „ალფა-ბანკს“ და ბანკ „ოტკრიტიეს“ ემუქრებათ ევროკავშირის მიერ რეფინანსირების მიზნით ობლიგაციების ან აქციების გამოშვების აკრძალვა; აშშ-მა „ალფა-ბანკის“ ნასესხებ და საკუთარ კაპიტალს დაუწესა შეზღუდვები, ბანკ „ოტკრიტიეს“ კი სანქციების მთელი პაკეტი შეეხება;
• ევროკავშირმა და გაერთიანებულმა სამეფომ გაყინეს ბანკ „როსიას“ და „პრომსვიაზბანკის“ აქტივები; აშშ-ის სანქციების სრული პაკეტი შეეხო „პრომსვიაზბანკს“;
• აშშ-ის სანქციების სრული პაკეტი შეეხო „სოვკომბანკს“ და „ნივკომბანკს“, ხოლო „რუსეთის სოფლის მეურნეობის ბანკს“, „მოსკოვის საკრედიტო ბანკს“ და „გაზპრომბანკს“ ნასესხებ და საკუთარ კაპიტალზე შეზღუდვები დაუწესდა;
• „იშ ბანკს“, „გენბანკს“ და „შავი ზღვის განვითარებისა და რეკონსტრუქციის ბანკს“ სანქციები დაუწესა გაერთიანებულმა სამეფომ;
• ევროკავშირმა სანქციები დაუწესა ბანკ „ვებ-ს“, რომელიც რუსეთის მთავრობისთვის შემოსავლის მნიშვნელოვანი წყაროა. „ვები“ უკვე იყო აშშ-ისა და გაერთიანებული სამეფოს სანქციების ქვეშ;
• აშშ-მა სანქციები დაუწესა ბელარუსის ორ სახელმწიფო ბანკს – „ბელინვესტბანკს“ და ბანკ „დაბრაბიტს“; სანქციები შეეხოთ ასევე კომპანიებს, „ბელბიზნესლიზინგს“ და „ბელინვესტ-ენჯინირინგს“, „ბელინვესტბანკის“ სახელით მოქმედებისთვის;

კომპანიები

გაერთიანებული სამეფო სანქციებს უწესებს შემდეგ რუსულ კომპანიებს:

• „აეროფლოტს“ აეკრძალება გაერთიანებული სამეფოს საჰაერო სივრცეში ფრენა;
• „როსტეხს“ – რუსეთის უმსხვილეს კომპანიას თავდაცვის სექტორში;
• „ურალვაგონზავოდ“ – მსოფლიოს უმსხვილესი ტანკების მწარმოებელი;
• „ტაქტიკური რაკეტების კორპორაცია“ – საზღვაო და საჰაერო რაკეტების მნიშვნელოვანი მიმწოდებელი;
• „გაერთიანებული საჰაერო კორპორაცია“ – რუსული კომპანია, რომელიც ამარაგებს სამხედრო ავიაციას;
• „გაერთიანებული გემთმშენი კორპორაცია“ – უმსხვილესი გემთმშენი კომპანია რუსეთში, რომელმაც მათ შორის საზღვაო გემები ააშენა.

ევროკავშირის სანქციებით:

• ევროკავშირის ქვეყნების კომპანიებს აეკრძალებათ რუსული იარაღის მწარმოებლისთვის, ას „კალაშნიკოვისთვის“  ტექნოლოგიების მიყიდვა;
• ევროკავშირის ქვეყნების კომპანიებს ეკრძალებათ საქმიანი ურთიერთობა შემდეგ რუსულ კომპანიებთან: „ალმაზ-ანტეი“ (იარაღის მწარმოებელი), „კამაზ“ (სატვირთო მანქანების მწარმოებელი), ნოვოროსიისკის კომერციულ პორტთან, „როსტეხთან“, „რუსეთის რკინიგზასთან“, ბირთვული წყალქვეშა ნავების მწარმოებელ „სევმაშთან“, „სოვკომფლოტთან“ და „გაერთიანებულ გემთმშენ კორპორაციასთან“;
• ევროკავშირის სანქციები ასევე შეეხება „ინტერნეტის კვლევის სააგენტოს“, რომელიც დეზინფორმაციის კამპანიების უკან დგას და ევგენი პრიგოჟინის მიერ ფინანსდება.

აშშ-ის სანქციები:

• რუსულ კომპანიებს („გაზპრომი“, „გაპზრომ ნეფტ“, „ტრანსნეფტ“, „რუსჰიდრო“, „სოვკომფლოტ“, „რუსეთის რკინიგზა“, „როსტელეკომი“, „ალროსა“) აეკრძალათ ფინანსირების მოზიდვა აშშ-ის ბაზარზე;

სხვა სანქციები

გაერთიანებული სამეფო:

• შეიზღუდა რუსეთის შეძლებული მოქალაქეების წვდომა გაერთიანებული სამეფოს ბანკებზე, მათ საბანკო ანგარიშზე წესდება ლიმიტი 50 000 ფუნტის ოდენობით;
• ყველა რუსული ფინანსური ინსტიტუტის აქტივები გაერთიანებულ სამეფოში გაიყინება;
• იკრძალება მაღალტექნოლოგიური აღჭურვილობის ექსპორტი ისეთ სექტორებში, როგორებიცაა ელექტრონიკა, ტელეკომუნიკაცები და აერო-კოსმოსი;
• გაერთიანებული სამეფოს მოქალაქე ან იქ დარეგისტრირებული იურიდიული პირები ვერ აწარმოებენ საქმიანობას დონეცკში და ლუგანსკში, სანამ ისინი უკრაინის ხელისუფლების კონტროლის ქვეშ არ იქნება.

ევროკავშირი:

• რუსეთის მოქალაქეების დეპოზიტები ევროკავშირის ბანკებში ვერ იქნება 100 000 ევროზე მეტი;
• ევროკავშირში აიკრძალება რუსეთის სახელმწიფო კომპანიების აქციების გაყიდვა;
• იკრძალება ნავთობის მოპოვების ტექნოლოგიების მიყიდვა რუსეთისთვის/რუსული კომპანიებისთვის;
• კიდევ უფრო იზღუდება ტექნოლოგიების, მათ შორის ნახევარგამტარების ექსპორტი;
• იკრძალება რუსული ავიახაზებისთვის და კოსმოსური სექტორისთვის აღჭურვილობის მიყიდვა და მათზე დაზღვევის გაცემა;
• რუსი ჩინოვნიკები, დიპლომატები და ბიზნესმენები ვეღარ გამოიყენებენ სავიზო რეჟიმის გამარტივებულ პროცედურებს.

აშშ:

• ვაშინგტონმა შეზღუდა მაღალტექნოლოგიური პროდუქციის ექსპორტი რუსეთში;
• შეზღუდა ჩიპების და კომპიუტერული ტექნიკის ექსპორტი;