მოლვაერი ერთ–ერთ პირველი მუსიკოსია, ვინც ჯაზისა და ელექტრონული ხმოვანების კომბინირებაზე დაიწყო მუშაობა. მისი კომერციულად ყველაზე წარმატებული ნამუშევარი 1997 წლის სადებიუტო სოლო -ალბომი “Khmer” იყო – გადამწყვეტი მომენტი ნილსის კარიერაში, რომელმაც სხვა ჭრილში მოათავსა მუსიკოსი და მრავალი ჯილდო მოუპოვა მას.
“როდესაც ნილს პიტერ მოლვაერს ცოცხლად პირველად მოვუსმინე, მეგონა, სამყარო აღსასრულს უახლოვდებოდა,” – წერს BBC-ის რადიოწამყვანი, ფიონა თოქინგტონი მოლვაერის შესახებ – “…პულსირებადი და ამაფორიაქებელი მუსიკა ანგელოზის სუნთქვასავით გამჭოლია. არა ნაზი ანგელოზისა რომანტიკული ნახატებიდან, არამედ ძლიერი არქანგელოზის სუნთქვა, რომელიც ცეცხლოვანი მახვილით – საყვირის ხმით –ავის მომასწავებელს გვიქადის…. მისი ჟღერადობა ვნებიანია, ეთერული სილამაზის, ერთდროულად ბნელი და, ამასთან, თანაგრძნობითა და წრფელი ჰუმანურობით სავსე”.
ბენდი თბილისში 6-კაციანი შემადგენლობით ჩამოდის, სასცენო შემადგენლობაში კი მოლვაერის საყვირს აკომპანირებას გიტარა და დასარტყამი ინსტრუმენტი გაუწევს.
ჯაზ- სერიების ფარგლებში “ისთერნ პრომოუშენის” მოწვევით 16 მარტს თბილისს იაპონელი მუსიკოსი და კომპოზიტორი კეიკო მაცუი ეწვევა. ამავე პროექტის ფარგლებში 21 აპრილს “ივენთ ჰოლი” ამერიკელ ჯაზშემსრულებელ სტეისი კენტსაც უმასპინძლებს, 3 მაისს კი- Lee Ritenour Band–ს.
1998 წლიდან მოყოლებული “ისთერნ პრომოუშენი” სხვადასხვა დროს იყო ორგანზატორი ისეთი მუსიკოსების კონცერტებისა საქართველოში, როგორებიცაა- რეი ჩარლზი, ჯეიმს ბრაუნი, ჯორჯ ბენსონი, ელ ჯერო, ბობი მაკფერინი, მანჰეტენ ტრანსფერი და სხვ.