კატეგორიის გარეშე •

შშმ პირი, რომელიც მთავრობის სახლთან შიმშილობს: პატრულმა ინვალიდი მიწოდა

20 ნოემბერი, 2017 • 2208
შშმ პირი, რომელიც მთავრობის სახლთან შიმშილობს: პატრულმა ინვალიდი მიწოდა

მოქალაქე ჯემალ ჭელიძე აჭარის მთავრობის სახლთან შიმშილობს. ის შეზღუდული შესაძლებლობის პირია და პატრულის მოქმედებას აპროტესტებს, რიმელმაც ადმინისტრაციული სამართადარღვევის ოქმში მოიხსენია, როგორც “ინვალიდი”.

ჯემალ ჭელიძე ხულოში ცხოვრობს, სოფელ ტუნაძეებში და ეტლის გარეშე ვერ გადაადგილდება. გვიყვება, რომ დღეს დილით ხულოდან ავტომანქანით მოდიოდა ბათუმისკენ, როცა ხიჭაურის დასახლებასთან ახლოს სხვა ავტომანქანა დაეჯახა.

“მძღოლმა გააჩერა, მაგრამ მალე წავიდა, არ მოგვაქცია ყურადღება. დავრეკე 112-ში და პატრული გამოვიძახე. ვიდრე პატრული მოვიდოდა, უკნიდან მანქანებმა საყვირები ჩართეს და გზის გათავისუფლებას გვთხოვდნენ. ვიცი, რომ მანქანის გადაადგილება ამ დროს არ შეიძლება, მაგრამ მძღოლს ვუთხარი, 5 მეტრით გვერდით გავიწიოთ, იქნებ ვინმეს სასწრაფოდ გზა სჭირდება-მეთქი. მოვიდა პატრული და ჩვენ დაგვაჯარიმა 250 ლარით, რატომ შეუცვალეთ მანქანას ადგილიო”, – ამბობს ჯემალ ჭელიძე.

მოქალაქე ამბობს, რომ პატრულის თანამშრომლებმა იგი შემთხვევის ადგილას დაახლოებით 6 საათი გააჩერეს და მაშინ მისცეს წასვლის უფლება, როცა სასწრაფო სამსახურის ბრიგადამ მოითხოვა ჯემალ ჭელიძის სტაციონარში გადაყვანა.

“ჯერ ერთი ოქმში ჩამიწერეს ინვალიდი, რომ თითქოს მე საკუთარ თავს ვუწოდე ინვალიდი… მერე აღარ გამოგვიშვეს, გამოძიება დაიწყეს. დიაბეტიკი ვარ და ცუდად რომ გავხდი, ბოლოს სასწრაფომ წამომიყვანა. ახლა მთავრობის სახლიდან არსად წავალ, ვიდრე დასასჯელი არ დაისჯება. მე რომ მაჯარიმებენ, თავის თავს რატომ არ აჯარიმებენ? ასევე მოვითხოვ გამგეობებში გააკეთონ ადაპტირებული შესასვლელი, რომ იქ შესვლა შევძლო”, – აღნიშნავს ჯემალ ჭელიძე.

მოქალაქეს უკვე შეხვდა აჭარის მთავრიბის აპარატის წარმომადგენელი. საქმისწარმოება დაიწყო სახალხო დამცველის აპარატმა.

 

მასალების გადაბეჭდვის წესი