პირველ რიგში, მაინტერესებს, ნამდვილად მოაწერეთ ხელი ამ განცხადებას?
დიახ.
განცხადების იმ რედაქციას მოაწერეთ ხელი, რომელიც გამოქვეყნდა?
ამ ტექსტს მოვაწერე ხელი, მიუხედავად იმისა, რომ მე მათთვის რაღაც სხვა რედაქცია მქონდა შეთავაზებული: უფრო ცოტათი რბილ რაღაცებში, მაგრამ მთლიან პათოსს ვეთანხმები, რა თქმა უნდა, ამიტომაც მოვაწერე ხელი.
ეს თქვენი რბილი ვერსია რას ითვალისწინებდა?
მე თავიდანვე არ დავიწყებდი [ტექსტში] გარყვნილებაზე [საუბარს], მიმაჩნია, რომ სიტყვა პერვერსია… ეს მერე უნდა ხსენებულიყო, რომ ჩვენ არ გვინდა ჩვენი კულტურული კოდი იყოს შერყეული იმით, რაც ჩვენთვის მიჩნეულია გარყვნილებად.
ვისი დაწერილია ეს ტექსტი?
იცით, მე მიკავშირდებოდა ზვიად ტომარაძე, ეს არის ადამიანი, რომელიც დემოგრაფიული საზოგადოების სახელით კონტაქტობდა ჩემთან, ხოლო ტექსტი უშუალოდ ვისი დაწერილია, არ ვიცი. ამ შემთხვევაში, მე უფრო ტექსტს ვკითხულობდი და არა იმას, ვინ იდგა მის უკან. მერე კი მითხრეს, რომ დაახლოებით ეს ხალხი აწერდა ხელს. ჩემი ვერსია ცოტა მოგვიანებით გაკეთდა, მე იქ რაღაც სხვა აქცენტებიც გავაკეთე, იგივე მარქსიზმთან დაკავშირებით, მანდ მარქსიზმი მხოლოდ უარყოფით კონტექსტში იყო ხსენებული…
თუმცა ახლა აქ მარქსიზმი მაინც მთავარი თემა ალბათ არ არის, უშუალოდ თქვენი შეთავაზებული ვერსიიდან თუ არის რამე გათვალისწინებული?
არა. აი, სიტყვა გარყვნილება, რომლითაც თავიდანვე [ტექსტი] იწყება, პირველივე წინადადებაში, მე არ მინდოდა, რომ ყოფილიყო მანდ, რადგან როცა ადამიანს გინდა რამე გააგებინო, იმ წუთში არ უნდა დააწვე “მაზოლზე”.
ჩავუღრმავდეთ ამ ტექსტის შინაარსს, სადაც წერია – გარყვნილება, პროვოკაცია, პროპაგანდა და ასე შემდეგ, აღარ ჩამოვთვლი, არ გეჩვენებათ, რომ ეს დისკრიმინაციული და ჰომოფობიური განცხადებებია?
ჰომოფობიური განცხადებები – ეს არის დღევანდელი ფანდი და კაი სიტყვაა ფანდი, მანდ ნახსენები. მე 63 წელია ვცხოვრობ აქ და ჰომოფობია არ მინახავს და არ დამიფიქსირებია, არც მე და არც ჩემს გარშემო მყოფებს.
17 მაისი არ იყო ჰომოფობია?
17 მაისი იყო ხალხის ამბოხი, რომელმაც ჩათვალა, რომ ჰომოსექსუალური ურთიერთობების ქადაგება და პროპაგანდა ძირს უთხის ჩვენს ეროვნულ ინტერესებს და თავად სიცოცხლეს, რისთვისაც ჩვენ აქ ვართ მოვლენილი ღმერთის მიერ. ამიტომ ეს იყო ამ ხალხის ამბოხი, მე ამ ხალხის ადვოკატი ვიყავი იმ დღესვე, 17 მაისს, როცა ვიყავი ტელეკომპანია “კავკასიაში”.
ვისი ადვოკატი იყავით?
ქართველი ხალხის, რომელმაც ჩათვალა, რომ ეს მის საწინააღმდეგოდ ხდება. თუ ჩემი უფლებები არ ილახება, მეც არავის უფლებებს არ ვლახავ, როცა შენ აპირებ გამართვას რაღაცების, რაზეც ამბობ, რომ ეს უწყინარი ფლეშმობია და ასე შემდეგ, სინმადვილეში ეს იყო იმის პროპაგანდა, რაც ჩვენი კულტურული კოდისთვის არის გარყვნილება, ხოლო თუ ამ კულტურულ კოდს არ შეინარჩუნებს ქვეყანა, ის დაიქცევა…
ბატონო იური, რა გარყვნილებაზე და პროპაგანდაზე საუბრობთ, ეს იყო ჰომოფობიის წინააღმდეგ მიმართული აქცია, რომელიც ტარდებოდა მთელ მსოფლიოში…
მთელი მსოფლიო ჩემთვის არ არის… მე არ მიმაჩნია, რომ ის, რაც ხდება მთელ მსოფლიოში, უნდა გადავიტანოთ ჩვენს ნიადაგზე. ჩვენ კი გვაქვს ეს არტისტული უნარი ყველაფრის ათვისების, მათ შორის ცუდის ათვისებისაც, მაგრამ უნდა დაფიქრდეს ერი, რას აკეთებს და მე მგონი, ერი ამგვარად დაფიქრდა, განა, სახელმწიფო ინსტიტუციებით, არამედ ადამიანებმა შინაგანი პროტესტი გამოთქვეს…
იმას, რასაც თქვენ შინაგან პროტესტს უწოდებთ, საუბარია 17 მაისზე, ძალიან ბევრმა ორგანიზაციამ, მათ შორის ევროსაბჭომ, იგივე ბატონმა ჰამერბერგმა, რასმუსენმა პირდაპირ ჩათვალეს ძალადობად…
არც რასმუსენი და არც ჰამერბერგი ჩემთვის არ არის ავტორიტეტი, დამიჯერეთ. ჩემთვის ავტორიტეტია ჩემი ერი, სადაც მე ვცხოვრობ და მთლიანად ფასეულობები – ეს არის ფასეულობები… დანარჩენი, ეს ევროპელი ჩინოვნიკები ჩემთვის არ არის ავტორიტეტი.
საბოლოო ჯამში, რისი თქმა გსურთ ჰამერბერგისთვის და რას მოითხოვთ?
ჩვენ გვინდა იმის თქმა, რომ… მანდ ძალიან კარგად არის ნახსენები, თუ რა კულტურულ ფასეულობებზე მოდიოდა ევროპა…
ამ ტექტს რომ თავი დავანებოთ, პირადად თქვენ რისი თქმა გინდოდათ?
მე მინდა იმის თქმა, რომ ჩვენ ვართ ერი, რომელსაც აქვს თავისი ფასეულობები, რომლის ნაწილიც ევროპის ფასეულობების ნაწილია. ჩვენ შეგვიძლია რაღაც გავიზიაროთ, რაღაც მივიღოთ და რაღაც არ მივიღოთ იმ ევროპიდან, რომელიც საკუთარ თავს განათლებულს უწოდებს. ჩვენ არანაკლებად ვართ განათლებული, შეგვიძლია რაღაც შევთავაზოთ და შეგვიძლია რაღაცით ვუშველოთ ევროპას. მე მონიტორინგს ვუკეთებ იმას, თუ რა ხდება ევროპაში და მიმაჩნია, რომ საქმე არ მიდის იქ კაი მიმართულებით.
ევროპის დემონიზაციასაც ხომ არ ახდენთ?
რა დემონიზაცია ეს არის? დემონიზაცია ბევრ ქვეყანაში გვინახავს, მაგრამ ეს არ არის დემონიზაცია, ეს არის უფრო თანაგრძნობა, რომ ევროპა კარგავს თავის ფასეულობებს და გადაიქცევა რაღაც, ვერ გავიგე კარგად, რად.
ჰამერბერგი დღეისათვის საქართველოს მთავრობის მრჩეველია ევროკავშირის ეგიდით, ხომ არ აპირებთ, რომ მისი თანამდებობიდან გადადგომა მოითხოვოთ?
არა. მე მგონი, ამ განცხადებაში ჰამერბერგის მისამართით არ არის რამე ცუდი სიტყვა. იქ არც ერთ შემთხვევაში არ არის მისი დაკნინება, უბრალოდ, ჩვენ გვაქვს უფლება თანაბრად ველაპარაკოთ მას და ჰამერბერგის განცხადება ან მოწოდება სახარების ფურცლები არ არის, რომლის ეჭვის ქვეშ დაყენებაც არ შეიძლება.
ჰამერბერგმა თქვენს ამ ტექსტზე რომ თქვას, ეს არის ჰომოფობიური განცხადება, დისკრიმინაციული, შეურაცხმყოფელი და ასე შემდეგ, ამ შემთხვევაში, რა რეაქცია გექნებათ?
თქვას… არ იქნება მართალი და კიდევ ერთხელ ვიმეორებ, რომ ის არ არის მოსე, რომელმაც 10 მცნება დადო და ჩვენ უპირობოდ უნდა შევასრულოთ.
