საქართველოს პარლამენტის ფრაქცია “ქართული ოცნება– რესპუბლიკელების” წევრი თამარ კორძაია ეხმაურება გოგი თოფაძის განცხადებებს თინა ხიდაშელის და რესპუბლიკური პარტიის წევრების, ლევან და დავით ბერძენიშვილების წინააღმდეგ.

კორძაია წერს,  რომ თოფაძის განცხადებები არის ორკესტრირებული კამპანია, რომელიც  უპირისპირდება ევროპულ და ევროატლანტიკურ ღირებულებებს.

ტელეკომპანია იბერიას ეთერით კი კორძაიამ განაცხადა, რომ გოგი თოფაძე ამ განცხადებებით კოალიციასა და გიორგი კვირიკაშვილს დაუპირისპირდა.

“თინა ხიდაშელი არის საქართველოს მთავრობის წევრი, რომელსაც ნდობა გამოუცხადა საქართველოს პარლამენტმა, რომლის ხელმძღვანელიც არის გიორგი კვირიკაშვილი. პრემიერმა მიიჩნია, რომ თინა ხიდაშელი არის ამ მთავრობაში ის ადამიანი, რომელმაც ამ მთავრობაში უნდა უზრუნველყოს საქართველოს ევროპული და ევროატლანტიკური ინტეგრაცია. პერსონალურად იმ მინისტრზე თავდასხმა, რომელიც არის წამატებული ამ სფეროში, არის თავდასხმა სახელმწიფოებრივ ინტერესებზე,” – აცხადებს თამარ კორძაია.