“ქართული ოცნების” ფრაქციის თავმჯდომარე გია ვოლსკი “ნეტგაზეთთან” საუბარში აცხადებს, რომ პარლამენტი საკონსტიტუციო ცვლილებების პროექტზე მუშაობს, რომლის თანახმად, კონსტიტუციაში გაკეთდება ჩანაწერი, რომ ქორწინება ოჯახის შექმნის მიზნით ქალისა და მამაკაცის ნებაყოფლობითი კავშირია.
“კონსტიტუციაში მცირეოდენ დამატებას გავაკეთებთ, რათა ამ თემაზე აღარ იყოს დებატები. ორგანული კანონის განმარტებას ქორწინების თაობაზე, კონსტიტუციაშიც ჩავწერთ. გარკვეული ჯგუფები სარგებლობენ კონსტიტუციის ამ ნაწილში კონკრეტიკის დეფიციტით და ამ თემას სპეკულაციებისთვის და პოლიტიკური დივიდენდების მისაღებად იყენებენ, მითუმეტეს წინასაარჩევნო პერიოდია. ყველა რელიგიური კონფესიისათვის მისაღებია ეს და გარდა ამისა, ეროვნული უსაფრთხოების საკითხია, სტაბილურობას და მშვიდობას უნდა შეუწყოს ხელი. ამასთანავე, არ უნდა დაირღვეს უმცირესობების უფლებები, როგორც ეს ანტიდისკრიმინაციული კანონით არის განსაზღვრული. ახალი არაფერი ხდება, უბრალოდ სინათლე, კონკრეტიკა შემოდის კონსტიტუციის იმ მუხლში, რომელიც უკვე არსებობს.”
“ნეტგაზეთის” კითხვას, “ქართული ოცნება” ამ ინიციატივით ცდილობს, თუ არა თვითონ მიიღოს პოლიტიკური დივიდენდები, დეპუტატი პასუხობს:
“შეიძლება ვიღაცამ მე, ან ჩემს კოლეგებს დაგვაბრალოს, თუ პირადად არ გვიცნობენ, მაგრამ ყველას ვერ მოთხოვ იმას, რომ სულში ჩაიხედონ ერთმანეთის იმაში. რეალურად, თუკი გავაანალიზებთ სიტუაციას, ამ საკითხის სპეკულაცია შეიძლება სწორედაც დაძაბულობის პროვოცირებისთვის გამოიყენოს მავანმა. მე, თუ ვარ პარლამენტში და ჩემი კოლეგები, რომლებიც ამ საკითხზე მუშაობენ, ეს იმას ნიშნავს, რომ რეალურად უნდა გამოვხატავდეთ კიდევაც ამომრჩევლის პოზიციას სხვადასხვა საკითხებთან დაკავშირებით. აქ სპეკულაციას ნამდვილად არ აქვს ადგილი. ”
მისივე განმარტებით, ცვლილებები არ ეხება ოჯახის განსაზღვრებას:
“ეს არ ეხება ოჯახის განსაზღვრებას. თუ სადმე, კერძო საუბარში სიტყვა ოჯახი მიხსენებია, ვფიქრობ, რომ შეცდომაა ასე თქმა. სულაც ხელმოწერის გარეშე შეიძლება ცხოვრობდნენ ადამიანები და რაღაც რელიგიური წესით იყვნენ დაკავშირებული, ან სულაც, არც რელიგიური წესით და არც ხელმოწერით იყვნენ კავშირში, მაგრამ ეს ოჯახია და პატივი უნდა ვცეთ საზოგადოებამ ასეთ არჩევანს. არის ქონებრივი და სამართლებრივი საკითხები, რომლებიც აქტით ფორმდება და თუ ეს აქტი არ არსებობს და ადამიანებს გადაწყვეტილი აქვთ, რომ ოჯახი შექმნან ისეთი პრინციპით, როგორიც თვითონ მიაჩნიათ მართებულად, ეს მათი საქმეა. იგივე ქვრივი და შვილი, ან ქალი და კაცი ცხოვრობენ ერთად, ან თუნდაც ერთსქესიანები ცხოვრობენ ერთად, მაგრამ ეს არ არის ქორწინება, ქორწინების დეფინიცია ხდება ამ ახალი ცვლილებებით.”
დეპუტატის განმარტებით, პროექტზე მუშაობა მიმდინარეობს და ის ჯერ დასრულებული არ არის.
_________________________________________________________________________
მოვლენათა ქრონოლოგია
- საქართველოს კონსტიტუციის 36-ე მუხლის პირველი პუნქტის მიხედვით, ქორწინება ემყარება მეუღლეთა უფლებრივ თანასწორობასა და ნებაყოფლობას.
- 2012 წლის საქართველოს საპრეზიდენტო არჩევნების წინ ქრისტიანულ-დემოკრატიულმა მოძრაობამ მოამზადა საკონსტიტუციო ცვლილებების პროექტი, რომელიც ითვალისწინებდა კონსტიტუციის 36-ე მუხლის ცვლილებას შემდეგი რედაქციით: “სახელმწიფო აღიარებს მამაკაცისა და ქალის ქორწინებას, რომელიც ემყარება მეუღლეთა უფლებრივ თანასწორობასა და ნებაყოფლობას.“ ქდმ-მ ამ ინიციატივის მხარდასაჭერად მაშინ ხელმოწერების შეგროვება დაიწყო. ეს ინიციატივა ასევე გახდა ჰომოფობიაზე დისკუსიის საფუძველი.
- 2014 წელს მაშინდელი პრემიერ-მინისტრი ირაკლი ღარიბაშვილი გამოვიდა ინიციატივით, კონსტიტუციაში შეეტანათ ჩანაწერი, რომ “ოჯახი არის ქალისა და მამაკაცის ერთობა” [სავარაუდოდ მას მხედველობაში ჰქონდა ქორწინება, რადგანაც “ოჯახი” საერთოდ არ გვხდება კონსტიტუციაში”. მაშინ ღარიბაშვილმა განაცხადა, რომ ოჯახის დეფინიციის კონსტიტუციით გამყარების ინიციატივა განხილული და მოწონებულია კოალიცია „ქართული ოცნების“ პოლიტსაბჭოს მიერ.
- 2016 წლის 27 იანვარს მოქალაქე გიორგი ტატიშვილმა საქართველოს საკონსტიტუციო სასამართლოს მიმართა საქართველოს სამოქალაქო კოდექსის იმ ნორმის არაკონსტიტუციურად ცნობის შესახებ, რომელიც ქორწინებას მხოლოდ ქალსა და კაცს შორის აღიარებს.
- 2016 წლის 7 თებერვალს საქართველოს მართლმადიდებელმა ეკლესიამ მიმართა შინაგან საქმეთა მინისტრს გიორგი ტატიშვილისთვის დაცვის გამოყოფის თხოვნით. ეკლესიამ განაცხადა, რომ ტატიშვილი არის ლგბტ საზოგადოების წარმომადგენელი და რადგანაც მოსახლეობის უდიდესი ნაწილი უარყოფითად არის განწყობილი “ასეთ კანონთან მიმართებაში” არის საშიშროება, რომ გარკვეული ძალების მიერ ეს მდგომარეობა იქნას გამოყენებული პროვოცირებისათვის და გიორგი ტატიშვილის სიცოცხლეს საფრთხე შეექმნას. შსს სამინისტრო არ ავრცელებს ინფორმაციას, გამოუყვეს თუ არა დაცვა გიორგი ტატიშვილს საპატრიარქოს თხოვნის საფუძველზე;
- 2016 წლის 8 თებერვალს ლგბტ ორგანიზაციები ქორწინების თანასწორობასთან დაკავშირებით გიორგი ტატიშვილის ინიციატივას გაემიჯნენ და განაცხადეს, რომ გიორგი ტატიშვილს არ ჰქონია ლგბტ თემთან საკანონმდებლო ინიციატივაზე დისკუსია და იგი მოქმედებს არა ლგბტ ადამიანების, არამედ საკუთარი სახელით. მათი აზრით, ინიციატივა ქორწინების დეფინიციასთან დაკავშირებით პროვოკაციულია და ლგბტ ადამიანების უფლებების არა დაცვისკენ, არამედ მათი დაზარალებისკენ არის მიმართული.
- 2016 წლის 9 თებერვალს, საინფორმაციო სააგენტო “ინტერპრესნიუსის” ცნობით, გია ვოლსკიმ განაცხადა, რომ საპარლამენტო უმრავლესობას მზად აქვს კანონპროექტი, რომლის მიხედვითაც კონსტიტუციაში გადავა ოჯახის ის დეფინიცია, რაც საქართველოს სამოქალაქო კოდექსშია.
