მთავრობის ადმინისტრაციის ცნობით, საქართველოს ენერგოსექტორის განვითარებასა და ევროპის ენერგეტიკულ გაერთიანებაში გაწევრიანების მისწრაფებაზე ისაუბრეს საქართველოს პრემიერ-მინისტრმა გიორგი კვირიკაშვილმა და ევროკომისარმა კლიმატისა და ენერგორესურსების საკითხებში მიგელ არიას კანიეტემ დღეს გამართულ შეხვედრაზე.

პრემიერმა აღნიშნა, რომ საქართველოს, როგორც ევროკავშირის სანდო პარტნიორის სურვილია, შექმნას რეგიონში ყველაზე მიმზიდველი ენერგეტიკული ბაზარი.

გიორგი კვირიკაშვილის თქმით, საქართველოს მთავრობა ხელს უწყობს განახლებადი ენერგიის წარმოებისკენ მიმართულ პროექტებს, რომელთა მიზანია, საქართველო, მწვანე ენერგიის წარმოების მხრივ, რეგიონული ლიდერი გახდეს. პრემიერმა ევროკომისარს მიაწოდა ინფორმაცია, რომ ამჟამად 114 ასეთი პროექტი მიმდინარეობს, რომელთა ჯამური საინვესტიციო ღირებულება 6.4 მილიარდი დოლარია.

პრემიერ-მინისტრმა შეხვედრისას ასევე ისაუბრა ქარის ელექტროსადგურის პირველი საპილოტე პროექტის შესახებ, რომელსაც საქართველოს ენერგეტიკის სამინისტრო საქართველოს ენერგეტიკის განვითარების ფონდთან ერთად შიდა ქართლში ახორციელებს და რომლის დასრულება 2016 წლის პირველ კვარტალში იგეგმება.

ადმინისტრაციის ინფორმაციით, მხარეებმა ასევე ისაუბრეს სამხრეთის გაზის დერეფნისა და სამხრეთკავკასიური მილსადენის მნიშვნელობაზე, რომელიც „შაჰდენიზის“ პროექტის ნაწილია. შეხვედრაზე აღნიშნა, რომ პროექტები ეკონომიკური თანამშრომლობის გაღრმავებას, ენერგეტიკული უსაფრთხოების გაძლიერებას, რეგიონის ეკონომიკურ განვითარებას და სტაბილურობას უზრუნველყოფს.