ახალი ამბები

პრემიერი აჭარის მთავრობას ახალი პროექტების განხორციელების დაჩქარებას სთხოვს

5 თებერვალი, 2016 • 1331
პრემიერი აჭარის მთავრობას ახალი პროექტების განხორციელების დაჩქარებას სთხოვს

საქართველოს პრემიერ-მინისტრის აპარატის ცნობით, გიორგი კვირიკაშვილი აჭარის მთავრობას ახალი პროექტების განხორციელების დაჩქარების თხოვნით მიმართავს.

მთავრობის მიერ გავრცელებულ განცხადებაში ნათქვამია, რომ გიორგი კვირიკაშვილი მიიჩნევს, რომ აჭარას აქვს პოტენციალი, იყოს ერთ-ერთი ყველაზე დინამიკურად განვითარებადი რეგიონი საქართველოში და ამ მიმართულებით გარკვეული რეზერვები არსებობს.

„ბოლო პერიოდში რამდენიმე ინვესტორს შევხვდი. ზოგადად, ახალი პროექტების განხორციელების სურვილი არის, მაგრამ მე მაინც ვისურვებდი, ცოტა მეტი სიჩქარე მენახა ამ მიმართულებით. აჭარაში ეკონომიკური ზრდა საკმაოდ კარგია, მაგრამ მგონია, რომ პოტენციალი უფრო მეტია. ჩვენ გვინდა, ეს დაფარული რეზერვები ავამოქმედოთ და აჭარას განვითარების კიდევ უფრო მეტი დინამიკა შევძინოთ“, – განაცხადა პრემიერ-მინისტრმა სამუშაო შეხვედრაზე, რომელზეც, ოფიციალური ინფორმაციითვე, აჭარის მთავრობის წევრებმა რეგიონში მიმდინარე პროექტები და სამომავლო გეგმები წარადგინეს.

“პრემიერ-მინისტრმა მზადყოფნა გამოთქვა, ცენტრალური მთავრობა მაქსიმალურად დაეხმაროს ადგილობრივ ხელისუფლებას, რათა ეკონომიკური პროექტები მაქსიმალურად დაჩქარდეს და ასევე, გაუმჯობესდეს კომუნიკაცია. გიორგი კვირიკაშვილი ასევე ბათუმის ბულვართან დაკავშირებულ მოვლენებს გამოეხმაურა და აჭარის ხელმძღვანელობას ამ თემაზე მოსახლეობასთან მეტი კოორდინაცია სთხოვა”, – წერია მთავრობის პრესსამსახურის განცხადებაში.

„ვფიქრობ, უკეთესი იქნებოდა, ცოტა მეტი კონსულტაცია ყოფილიყო ამ საკითხთან დაკავშირებით. ისეთ თემებზე, სადაც შეგვიძლია, თავიდან ავიცილოთ ზედმეტი ხმაური, კარგი იქნება უფრო მეტი კოორდინაცია და დიდი იმედი მაქვს, მომავალში ასე იქნება“, – განაცხადა პრემიერმა.

მასალების გადაბეჭდვის წესი