დღეს, 26 დეკემბერს, საქართველოს რაგბის კავშირის გამგეობის სხდომაზე გადაწყდა, რომ რაგბის კავშირის საპრეზიდენტო არჩევნები 24 იანვარს გაიმართება.

რაგბის კავშირის ინფორმაციით, გამგეობის წევრებმა სხდომაზე სრკ-ს საერთო კრების ახალი თარიღისა და ადგილის დადგენის, სრკ-ს პრეზიდენტობის კანდიდატთა საერთო კრებისათვის წარდგენის ვადისა და წესის განსაზღვრის შესახებ იმსჯელეს.

გამგეობის სხდომაზე ხმათა აბსოლუტური უმრავლესობით შემდეგი გადაწყვეტილებები მიიღეს:

• სრკ-ს წლიური საერთო კრება მოწვეულია 2016 წლის 24 იანვარს, 13 საათზე თბილისში, მისამართზე: თავისუფლების მოედანი #4 – სასტუმრო ქორთიარდ მერიოტი;
• სრკ-ს 2016 წლის 24 იანვრის საერთო კრებისთვის სრკ-ს პრეზიდენტობის კანდიდატის წარდგენის ბოლო ვადად განისაზღვროს 2016 წლის 18 იანვარის 13 საათი;
• სრკ-ს პრეზიდენტობის კანდიდატთა წარდგენა უნდა განხორციელდეს წერილობითი ფორმით სრკ–ის ნამდვილი წევრის მიერ სრკ–ის გამგეობაში;
• სრკ-ს ნამდვილი წევრის მიერ წარდგენილმა პრეზიდენტობის კანდიდატმა 2016 წლის 18 იანვარის 13 საათმდე უნდა წარმოადგინოს წერილობითი თანხმობა სრკ-ს გამგეობაში სრკ-ს საპრეზიდენტო არჩევნებში მონაწილეობის შესახებ.

გამგეობის ახალი საერთო ყრილობის ოქმის მიხედვით, სხდომას გამგეობის თავმჯდომარე გოჩა სვანიძე უძღვებოდა. სხდომას ესწრებოდნენ გამგეობის წევრები: ირაკლი კიზირია, დიმიტრი კალანდაძე, ვასილ კევლიშვილი, გიორგი ღლონტი, გიორგი გორგასლიძე, კახა მხეიძე, ვატო ლეჟავა. გიორგი გეგენავას და თემურ ბენდიაშვილის ხმა გამგეობაზე გოჩა სვანიძემ წარმოადგინა. სხდომის მდივანი – ედუარდ ნაჭყებია.

როგორც ოქმშია აღნიშნული, სხდომას ესწრებოდა საქართველოს მორაგბეთა ეროვნული ნაკრების წარმომადგენელი გამგეობაში ირაკლი აბუსერიძეც.