მარიამ ღვთისმშობლის ამაღლების თბილისის კათოლიკურ ეკლესიაში ქრისტეს შობა იზეიმეს.
ეკლესიაში შეკრებილები 25 დეკემბერს საზეიმო ლიტურგიით შეეგებნენ, რომელიც 24 დეკმებერს, 23:30 საათზე დაიწყო. მესას კათოლიკე მრევლთან ერთად მთავრობის წარმომადგენლებიც ესწრებოდნენ: თბილისის მერი დავით ნარმანია და ლტოლვილთა და განსახლების მინისტრი სოზარ სუბარი.
ეკლესიაში ასევე იმყოფებოდნენ ყოფილი პირველი ლედი სანდრა რულოვსი, პარლამენტარი გიგი წერეთელი, ნაციონალური მოძრაობის წევრი ნიკა მელია, თბილისის საკრებულოს წევრები: სევდია უგრეხელიძე და ირაკლი აბესაძე.
24 დეკემბრის ღამეს შობა იზეიმა ევანგელურ-ბაპტისტურმა ეკლესიამ თბილისის მშვიდობის კათედრალში, სადაც ღვთისმსახურება 23:45 საათზე დაიწყო. შობას ზეიმობენ ასევე სახარების რწმენის ეკლესია და რუთერული ეკლესია.
ქრისტიანული ტრადიციის მიხედვით, 25 დეკემბერს ბეთლემში იესო ქრისტე დაიბადა, რომელიც არის ღმერთის შვილი. ქრისტეს ცხოვრებამ საფუძველი დაუდო ქრისტიანულ ეკლესიას.