ახალი ამბები

მთავრობა სკოლებსა და ბაღებში კვებისა და ჰიგიენის კონტროლის ნორმებს ამკაცრებს

11 დეკემბერი, 2015 • 1379
მთავრობა სკოლებსა და ბაღებში კვებისა და ჰიგიენის კონტროლის ნორმებს ამკაცრებს

პრემიერ–მინისტრი ირაკლი ღარიბაშვილი შესაბამის სტრუქტურებს მოუწოდებს, კვებისა და ჰიგიენის ნორმების დარღვევის თითოეულ ფაქტზე სათანადო რეაგირება მოხდინონ.

“გვინდა მაქსიმალურად გავამკაცროთ უსაფრთხოების ზომები, არც ერთი სკოლა არ უნდა დარჩეს შემოწმების გარეშე, რაც პირად კონტროლზე აქვს აყვანილი სოფლის მეურნეობის მინისტრს. თუ რომელიმე სკოლაში გამოვლინდება კვების რაციონისა თუ ჰიგიენური ნორმების დარღვევა, მაქსიმალურად მკაცრ ზომებს მივიღებთ,”– განაცხადა ირაკლი ღარიბაშვილმა მთავრობის სხდომაზე.

სხდომაზე აღინიშნა, რომ 2013 წლამდე სკოლებში ამ მიმართულებით ინსპექტირება არ ხდებოდა და შესაბამისად არ არსებობდა სტატისტიკა.

“ამ ეტაპზე შექმნილია სამუშაო ჯგუფი, რომლის შემადგენლობაშიც შედიან განათლების, სოფლის მეურნების, რეგიონული განვითარების სამინისტროები, სურსათის უვნებლობის ეროვნული სააგენტო და მთავრობის ადმინისტრაციის რეგიონებთან და ადგილობრივ თვითმმართველ ორგანოებთან ურთიერთობის დეპარტამენტი. უკვე შემოწმებულია საქართველოს მასშტაბით მოქმედი ყველა ბაღი და სკოლების 60%–ი. მონიტორინგის შედეგების მიხედვით, ჯანდაცვის სამინისტრომ სტანდარტების სარეკომენდაციო პაკეტი შეიმუშავა. შედგენილია სკოლის კვების რაციონი და მიმდინარეობს მუშაობა ბაღების კვების რაციონზე”.

მასალების გადაბეჭდვის წესი