ვალენტინობას სანახავი 10 რომანტიკული ფილმი

ბრიტანული გამოცემა „გარდიანი“საუკეთესო რომანტიკული ფილმების ათეულს აქვეყნებს. გთავაზობთ ამ ათეულს. 

 10. Jules and Jim

1962 წელს გადაღებული ფრანგული მელოდრამა. ფილმში მოქმედება პარიზში ვითარდება, პირველი მსოფლიო ომის დაწყებამდე. ფილმი მოგვითხრობს ორ მეგობარზე რომელთაც ერთი ქალი შეუყვარდათ.

9. ოთახი ხედით

1985 წელს გადაღებული სამი ოსკარის მფლობელი ჯეიმს აივორის ფილმი. ფილმში მოქმედება მეოცე საუკუნის 10-იან წლებში ვითარდება. ფილმის მთავარი მოქმედი გმირი ლუსი, რომლის როლსაც ჰელენა ბონემ კარტერი ასრულებს, სამოგზაუროდ იტალიაში მიდის.

ოსკარის გარდა ფილმს ორი ოქროს გლობუსი აქვს მიღებული.

 

8. ნათელი გონების მარადიული ბრწყინვალება

მიშელ გონდრის ამ ფილმის ბიუჯეტი 20 მილიონი იყო, ფილმმა შემქმნელებს 72 მილიონი მოუტანათ.

ფილმი მოგვითხრობს ორ ადამიანზე, რომლებიც ერთმანეთის დავიწყებას ცდილობენ. არის თუ არა შესაძლებელი მოგონებებიდან  ურთიერთობების ამოშლა ამ კითხვაზე პასუხს ფილმიდან მიიღებთ.

7. ჰანა და მისი დები

ვუდი ალენის რომანტიკული კომედია სამი დის ერთმანეთისგან განსხვავებული ცხოვრების და სასიყვარულო ურთიერთობების შესახებ.

ფილმი 1987 წელს გამოვიდა. შემქმნელებს 40 მილიონი დოლარი, სამი ოსკარი და ოქროს გლობუსი მოუტანა.

 6. ბინა

ბილი უაილდერის ამ ცნობილ ფილმში მოქმედება 60-იანი წლების ამერიკაში ვითარდება. სადაზღვევო კომპანიის აგენტი ცდილობს კარიერაში დაწინაურდეს. ამასობაში კი მისი ხელმძღვანელის მეგობარი გოგონა შეუყვარდება.

ფილმს ხუთი ოსკარი აქვს მიღებული.

 5.  სასიყვარულო განწყობა

ერთ-ერთი საუკეთესო ფილმი, რომელიც ორ ადამიანს შორის  ურთიერთობებს ეხება. ამბავი ორ კარის მეზობელზე, რომლებიც ჯერ მეგობრები ხდებიან, შემდეგ კი  ერთმანეთი შეუყვარდებათ.

4. უკანასკნელი ამოსუნთქვა

ჟან-ლუი გოდარის არაჩვეულებრივი ფილმი, რომელიც მოგვითხრობს ორი თავზეხელაღებული ნიჰილისტის ურთიერთობაზე.  ეს არის  არასენტიმენტალური ფილმი სენტიმენტალურ გრძნობაზე – სიყვარულზე.

3. მზის ამოსვლამდე / მზის ჩასვლამდე/ შუაღამემდე

ტრილოგიის პირველ ფილმში მოქმედება 1995 წელს ხდება. ახალგაზრდა ამერიკელი ჯესი მატარებელში გაიცნობს ფრანგ სელინს. რეჟისორმა რიჩარდ ლინკლეიტერმა  პირველი ფილმის გაგრძელება 2004 წელს გადაიღო. ფილმში „მზის ჩასვლამდე“  მოქმედება წყვილის შეხვედრიდან 9 წლის შემდეგ ვითარდება. ბოლო ფილმი 2013 წელს გამოვიდა. „შუაღამემდე“ ასე ჰქვია მესამე ფილმს.

2. კასაბლანკა

მაიკლ კურტისს ამ ფილმმა სამი ოსკარი და საყოველთაო აღიარება მოუტანა. ფილმი მოგვითხრობს ადამიანებზე, რომლებიც ერთმანეთს ომმა დააშორა.

 1. მოკლე შეხვედრა

დევიდ ლინის 1945 წელს გამოსული ფილმი სიყვარულზეა. ფილმი ორ ქორწინებაში მყოფ ადამიანზე, რომლებიც ერთმანეთს რკინიგზის სადგურზე მდებარე კაფეში ხვდებიან ყოველ ხუთშაბათს.

ნეტგაზეთის მასალების სხვა გამოცემებში გადაბეჭდვის წესი


"ბათუმელები"