დღევანდელი აქციის მონაწილეები უერთდებიან სოლიდარობის გლობალურ კამპანიას Je suis Charlie Hebdo/მე ვარ შარლი ებდო, რომელიც მსოფლიოს სხვადასხვა ქვეყნებში იმართება ფრანგულ სატირულ ჟურნალ Charlie Hebdo-ზე თავდასხმისა და სიტყვისა და გამოხატვის თავისუფლების დაცვის გამო.
სოლიდარობის აქციის მოწყობა თბილისში სოციალურ ქსელ “facebook”-ის საშუალებით დაიგეგმა.
“ჩვენ ვიზიარებთ ფრანგი ხალხის მწუხარებას პარიზში, 7 იანვარს სატირულ ჟურნალ Charlie Hebdo-ზე განხორციელებული ტერორისტული თავდასხმის შედეგად მოკლული 12 ადამიანის გამო და ვგმობთ გამოხატვის თავისუფლების დათრგუნვისკენ მიმართულ ძალადობას.
8 იანვარი საფრანგეთის პრეზიდენტმა ფრანსუა ოლანდმა ეროვნულ გლოვის დღედ გამოაცხადა. ჩვენ, საქართველოს მოქალაქეები, თანადგომას და სოლიდარობას ვუცხადებთ ფრანგ ხალხს.
გთხოვთ, მოიტანოთ ყვავილები და სანთლები, რათა პატივი მივაგოთ დაღუპულთა ხსოვნას”, – წერენ აქციის ორგანიზატორები სოციალურ ქსელში.
ფრანგულ სატირულ ჟურნალ Charlie Hebdo-ზე თავდასხმა 7 იანვარს, სარედაქციო თათბირის დროს განხორციელდა. თავდასხმის შედეგად გარდაიცვალა 12 ადამიანი, მათ შორის გაზეთის მთავარი რედაქტორი და ოთხი კარიკატურისტი.
თავდასხმამდე Charlie Hebdo-მ გამოაქვეყნა ტვიტი, რომელსაც ISIS-ის ლიდერის აბუ ბაქარ ალ ბაღდადის კარიკატურა ახლდა.
საფრანგეთის პრეზიდენტმა ფრანსუა ოლანდმა მომხდარი ტერორისტულ აქტად შეაფასა. თავდასხმას გამოეხმაურნენ მსოფლიოს ლიდერები.
Charlie Hebdo-ზე განხორციელებული თავდასხმის გამო, ფრანგ ხალხს თანადგომა გამოუცხადეს საქართველოს პრემიერ-მინისტრმა და პრეზიდენტმა.