30 დეპუტატი, ვინც თემირლან მაჩალიკაშვილის საქმეზე საგამოძიებო საპარლამენტო კომისიის შექმნას დაუჭირა მხარი, ოპოზიციონერია. აღნიშნული ინიციატივისთვის მხარი მმართველი პარტიის არცერთ წევრს არ დაუჭერია.

რაც შეეხება კომისიის შექმნის 3 მოწინააღმდეგე დეპუტატს: ყველა მათგანი “ქართული ოცნების” წარმომადგენელია: აკაკი ზოიძე, კახა კუჭავა და სულხან მახათაძე. მმართველი პარტიის წევრთა დიდმა ნაწილმა კენჭისყრაში მონაწილეობისაგან თავი შეიკავა.

საგამოძიებო კომისიის შექმნას 50 დეპუტატის მხარდაჭერა ესაჭიროებოდა, თუმცა დადგენილების პროექტს მხოლოდ პარლამენტის 30-მა წევრმა დაუჭირა მხარი.

დადგენილების პროექტი, რომელიც ითვალისწინებს, მიზანშეწონილად იქნას მიჩნეული დროებითი საგამოძიებო კომისიის შექმნა, რომელიც 2017 წლის 26 დეკემბერს პანკისის ხეობაში ჩატარებული სპეცოპერაციის შედეგად თემირლან მაჩალიკაშვილის მკვლელობის ფაქტს შეისწავლის, ფრაქცია “ერთიანი ნაციონალური მოძრაობის” მიერ იყო ინიცირებული.