NDI-ის კვლევის მიხედვით, რომელიც დღეს, 20 მაისს გამოქვეყნდა, “იმედს” ენდობა მოსახლეობის 32%, “რუსთავი 2-ს” – 28%, ტვ “პირველს” კი- 4%. ნდობის 3-3%-იანი მაჩვენებლები აქვთ აზერბაიჯანულ ტელეარხ Az Tv-სა და საზოგადოებრივი მაუწყებლის პირველს არხს, სომხურ Armenia Tv-ს კი – 2%.
კვლევის მნიშვნელოვანი მიგნებაა ისიც, რომ არცერთ ტელეარხს არ ენდობა მოსახლეობის 19%.
ამავე კვლევით, მოსახლეობის 72%-სთვის პოლიტიკისა და მიმდინარე მოვლენებზე ინფორმაციის მისაღებად პირველადი წყარო არის ტელევიზია, 21%-სთვის კი -ინტერნეტი/ფეისბუკი. შემდეგ მოდის მეზობლები/მეგობრები – 3%, ოჯახის წევრები – 2%, თანამშრომლები – 1%.
რაც შეეხება გაზეთებსა და ჟურნალებს, აღნიშნული ტიპის მედიაინფორმაციის პირველწყარო მოსახლეობის მხოლოდ 1%-სთვის არის.
აღნიშნული კვლევა, 2019 წლის 28 მარტი-15 აპრილის პერიოდში, საქართველოს მასშტაბით 2 927 პირისპირი ინტერვიუს წარმომადგენლობითი შერჩევის საფუძველზე, ქვეყნის ქართულ, სომხურ და აზერბაიჯანულენოვან სრულწლოვან მოსახლეობას შორის ჩატარდა(ოკუპირებული ტერიტორიების გამოკლებით). კვლევა ასევე წარმომადგენლობითია აზერბაიჯანული და სომხური დასახლებებისთვის. გამოკითხვის საშუალო ცდომილების ზღვარი არის +/- 2.3 პროცენტი.