ვაკის პარკის მიმდებარე ტერიტორიაზე, სადაც ფაშიზმზე გამარჯვების 74 წლისთავთან დაკავშირებით “უკვდავი პოლკის” აქცია-მსვლელობა და კონტრაქცია “არა პუტინის მარშს” გაიმართა, ორი ადამიანი დააკავეს.

შინაგან საქმეთა სამინისტროს ინფორმაციით, საპატრულო პოლიციის თანამშრომლებმა ვაკის პარკის მიმდებარე ტერიტორიაზე, 2 პირი – 1983 წელს დაბადებული და 1958 წელს დაბადებული მოქალაქეები- წვრილმანი ხულიგნობის და პოლიციელის დაუმორჩილებლობის ფაქტზე, ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს.

“რუსეთს ვაგინე და დამაკავეს”, – განუცხადა ჟურნალისტებს ერთ-ერთმა მათგანმა დაკავებისას.

გარდა ამისა, პოლიციამ ერთი პირი, 1969 წელს დაბადებული თ.ფ. საბჭოთა სიმბოლიკის გამოყენებისთვის, საქართველოს კანონის “თავისუფლების ქარტიის” გათვალისწინებული წესების დარღვევისთვის 174-ე 16 პრიმა მუხლით, გადაიყვანა პოლიციის განყოფილებაში.