ივანიშვილს დაამარცხებს ივანიშვილი თავისი სისულელეებით – ოქრუაშვილის გეგმები

ირაკლი ოქრუაშვილი ახალ პოლიტიკურ მოძრაობას ქმნის, რომლის ერთ-ერთი წევრიც იქნება უზენაესი სასამართლოს ყოფილი თავმჯდომარე კოტე კემულარია. პოლიტიკური გეგმების შესახებ ყოფილმა თავდაცვის მინისტრმა ტვ პირველის გადაცემა “რეაქციაში” ისაუბრა.

როგორც ირაკლი ოქრუაშვილი ამბობს, კემულარიას გარდა, კიდევ ბევრი იქნება მის გვერდით, თუმცა ამ ეტაპზე მათთან შეუთანხმებლად არავის დაასახელებს. მისი განცხადებით, მოახლოებულ საარჩევნო ციკლში არავითარ შემთხვევაში არ დაუჭერს მხარს მიხეილ სააკაშვილს.

ირაკლი ოქრუაშვილი მიიჩნევს, რომ ბიძინა ივანიშვილის დამარცხების ყველაზე რეალური პრეტენდენტი მხოლოდ ერთი ადამიანია – ბიძინა ივანიშვილი:

ბიძინა ივანიშვილს დაამარცხებს ბიძინა ივანიშვილი. ივანიშვილი დამარცხდება თავისი სისულელეების კეთების შედეგად. ეს არის ჩემი დასკვნა”.

ყოფილი თავდაცვის მინისტრის თქმით, უფიქრია, რომ მისნაირ ადამიანს მორალური უფლება არ აქვს პოლიტიკაში ყოფნის, მაგრამ ირგვლივაც მისნაირი ან უარესები არიან:

ძალიან ბევრი მოუსმენია საკუთარ თავზე კრიტიკული, თუმცა არა საქმიანი. საბოლოო ჯამში, მიფიქრია მაინც, რომ ჩემნაირ ადამიანს მორალური უფლება არ აქვს პოლიტიკაში ყოფნის, მაგრამ ირგვლივ რომ მიმოვიხედავ ხოლმე და პოლიტიკურ სპექტრს თვალს გადავავლებ, ან ყველა ჩემნაირია, ან ჩემზე უარესი. ეს არის სამწუხარო რეალობა და თუ გვინდა ახლა ისევ უბიწობის და ქალიშვილობის რაღაც კრიტერიუმებით ვეძებოთ პოლიტიკოსები ამ ქვეყანაში, ეს ასე არ იქნება და შეუძლებელია ასე იყოს უცბად, სანამ თაობები არ შეიცვლება. დრო ცოტა გვაქვს, ცხოვრება გავიდა და უნდა შევცვალოთ რაღაცები, მაგრამ არა იმ ტემპით, როგორც 2004 და 2012 წლებში იცვლებოდა”.

ირაკლი ოქრუაშვილი პოლიტიკაში დასაბრუნებლად კონსულტაციებს მართავს

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.