80.1%-ის აზრით, კარგი განათლებისთვის კარგი ფინანსური მდგომარეობა აუცილებელია – CRRC

საქართველოს მოსახლეობის 80.1%-ის მოსაზრებით, კარგი განათლების მისაღებად კარგი ფინანსური მდგომარეობა აუცილებელია. დაახლოებით იგივე რაოდენობა (78.8%) ეთანხმება მოსაზრებას, რომ კარგი განათლების მისაღებად საჭიროა ნიჭიც.

საზოგადოებრივი აზრის ახალი კვლევის მონაცემები დღეს, 3 აპრილს გამოქვეყნდა. კვლევა კავკასიის კვლევითი რესურსების ცენტრმა (CRRC) საქართველოში ჩაატარა ღია საზოგადოების ფონდისა და საერთაშორისო ორგანიზაცია International IDEA-ს ერთობლივი პროექტი ფარგლებში

წყარო: CRRC

კვლევის მიხედვით, საქართველოს მოსახლეობის 31.6% ამბობს, რომ მიღებული აქვს უმაღლესი განათლება, ხოლო 36.8%-ის თქმით, მიღებული განათლების ყველაზე მაღალი საფეხური სრული საშუალო განათლებაა. 

როგორც კვლევის ავტორები აცხადებენ, გამოკითხვის შედეგები ასევე აჩვენებს რეგიონულ უთანასწორობას უმაღლესი განათლების მხრივ: საქართველოს რეგიონებში მცხოვრები მოსახლეობის მხოლოდ 24% ამბობს, რომ უმაღლესი განათლების დიპლომს ფლობს, მაშინ როცა იმავე კითხვაზე დადებითად თბილისის მოსახლოების 50.2% პასუხობს. 

მოსახლეობის გამოკითხვის მიხედვით, საქართველოს მოსახლეობის მხოლოდ 0.5%-ს აქვს სამეცნიერო ხარისხი.

მოსახლეობის 58.9% სრულად ეთანხმება მოსაზრებას, რომ საქართველოში წარმატების მისაღწევად აუცილებელია კარგი განათლება. კითხვაზე – დასაქმების ვის უფრო მაღალი შანსი აქვს: კანდიდატს შესაბამისი უნარებით თუ მინისტრის ნათესავს ნაკლები უნარებით – მოსახლოების 68.8 პროცენტი პასუხობს, რომ მაღალჩინოსნის ნათესავს. 

კვლევის ფარგლებში 1 786 რესპონდენტი (599 თბილისში, 1 187 რეგიონებში) გამოკითხა; რესპონდენტები შემთხვევითი შერჩევის პრინციპით, კიშის ცხრილის გამოყენებით შეირჩნენ. გამოკითხვის საშუალო ცდომილების ზღვარი 2,9%-ია, თუმცა თითეულ კითხვას ინდივიდუალური ცდომილების ზღვარი აქვს და შესაძლოა  არ ემთხვეოდეს საშუალო ცდომილების ზღვარს. საველე სამუშაოები 2018 წლის 16-27 ნოემბრის პერიოდში მიმდინარეობდა.

საქართველოს მთელ ტერიტორიაზე მოსახლეობის გამოკითხვა ჩატარდა კავკასიის კვლევითი რესურსების ცენტრის (CRRC) მიერ, ღია საზოგადოების ფონდისა და საერთაშორისო ორგანიზაცია International IDEA ერთობლივი პროექტის ფარგლებში.

ნეტგაზეთის მასალების სხვა გამოცემებში გადაბეჭდვის წესი
ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.