პრეზიდენტი ინტერვიუებზე სატელევიზიო სტუდიებში არ ივლის

სალომე ზურაბიშვილი აცხადებს, რომ პრეზიდენტმა თავისი სატელევიზიო ინტერვიუები მხოლოდ ოფიციალურ სასახლეში უნდა ჩაწეროს. დღეს ტვ პირველმა ინგა გრიგოლიას მიერ ზურაბიშვილისგან აღებული ინტერვიუ გამოაქვეყნა, რომელიც პრეზიდენტის სასახლეშია ჩაწერილი.

ინტერვიუს ჩანაწერში ამ საკითხზე ჟურნალისტი ინგა გრიგოლია და ზურაბიშვილი კამათობენ. პრეზიდენტი ამბობს:

“პრეზიდენტი არ უნდა წავიდეს სტუდიაში იმიტომ, რომ ასეთია წესი და რაღაც წესებს უნდა შევეჩვიოთ, თუ გვინდა, რომ სახელმწიფო სახელმწიფოს ჰგავდეს”. “პრეზიდენტმა თავისი სასახლიდან… სადაც არის დროშა და ატრიბუტიკა, იქიდან უნდა გააკეთოს განცხადება”, – აცხადებს ზურაბიშვილი და დასძენს, რომ ეს საკითხი არა მედიასთან, არამედ პროტოკოლთანაა დაკავშირებული.

“ეს არის პროტოკოლის წესი და საერთოდ პროტოკოლის აზრზე არ ვართ”, – ამბობს ზურაბიშვილი და დასძენს, რომ ინტერვიუებს მომავალშიც სასახლეში ჩაწერს, თუმცა, თუ ტექნიკური მხარე ამის საშუალებას მისცემს, ეს შეიძლება იყოს პირდაპირი ეთერი და არა ჩანაწერი, როგორც დღევანდელ შემთხვევაში.

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com