შეზღუდული შესაძლებლობების მქონე ბავშვების მშობლებისთვის თბილისში საინფორმაციო ცენტრი იხსნება. ეს იქნება პირველი საინფორმაციო ფსიქო-ემოციური მხარდაჭერის ცენტრი, რომელიც შშმ პირთა მშობლემებს მოემსახურება.

ფონდ ღია საზოგადოება-საქართველოს დაფინანსებით ცენტრი ორი წლის განმავლობაში იფუნქციონირებს, თუმცა, როგორც საქართველოს დაუნის სინდრომის ასოციაციის ხელმძღვანელი ლია ტაბატაძე ამბობს, ყველაფერს გააკეთებენ იმისთვის, რომ ეს პროექტი მომავალშიც გაგრძელდეს და ის ადგილობრივი მუნიციპალიტეტების მიერ დაფინანსდეს. მისი თქმითვე, საინფორმაციო ცენტრის მეშვეობით დაინტერესებული პირები ამომწურავ და კომპეტენტურ ინფორმაციას მიიღებენ საქართველოში არსებული სერვისების შესახებ.

“გვექნება მუდმივი ცხელი ხაზი, სადაც ნებისმიერ საკითხზე ამომწურავ ინფორმაციას მიიღებენ. ასევე ვგეგმავთ ყოველკვირეულ შეხვედრებს ხუთშაბათსა და ორშაბათს ბავშვების მშობლებთან. ამ შეხვედრებზე დაგროვილ თემებზე საჭიროების შემთხვევაში მათთვის ტრენინგებიც ჩატარდება. მაგალითად, ვისაც აინტერესებს 0-დან 3 წლამდე ან 3-დან 7 წლამდე ბავშვის განვითარების ეტაპები, მათ ტრენინგები ამ მიმართულებით ჩაუტარდებათ. თუ მშობლების მხრიდან უფლებების საკითხზე ინტერესს დავინახავთ, ტრენინგიც ამ საკითხზე ჩატარდება. მშობლებს უნდა ჰქონდეთ ინფორმაცია ყველა იმ სახელმწიფო პროგრამისა და სერვისების შესახებ, რაც მათი შვილებისთვის დღეს არის ხელმისაწვდომი,”-ამბობს ლია ტაბატაძე.

მისი თქმითვე, მსგავსი საინფორმაციო ცენტრი აქამდე არ ყოფილა და ასოციაცია გეგმავს იმუშაოს სახელმწიფოსთან, რათა მომავალში ეს ცენტრები მუნიციპალიტეტების მიერ დაფინანსდეს. ლია ტაბატაძე განმარტავს, რომ შეზღუდული შესაძლებლობის მქონე პირების მშობლებს ხვალ, 19 მარტს, უკვე შეეძლებათ დაუკავშირდნენ ცენტრს ცხელ ხაზზე 551 46 15 55.

ამ ეტაპზე ცენტრში 8 ადამიანი იმუშავებს, თუმცა, როგორც ორგანიზატორები ამბობენ, მომავალში თანამშრომელთა რაოდენობა გაიზრდება. ლიკა ტაბატაძის თქმით, ხშირია შემთხვევები, როცა დაუნის სინდრომის მქონე პირის მშობელი ასოციაციას ურეკავს მაშინ, როცა ბავშვი უკვე 6 წლის არის. ამ დროს მისთვის ადრეული განვითარების პროგრამა დაგვიანებულია და მშობელი მაშინ იგებს, რომ მსგავს პროგრამას სახელმწიფო აფინანსებს 7 წლამდე ასაკის ბავშვებისთვის.

“ამ პროექტის განმახორციებლები ჩვენ, თავად მშობლები ვართ. მეც არაფრის შესახებ ინფორმაცია არ მქონდა. კითხვა-კითხვით ისევ მშობლები ვავრცელებდით ინფორმაციას. ეს წლებია გრძელდება და ამას რაიმე სისტემური, მოწესრიგებული სახე არ ჰქონდა. ამიტომ, გადავწყვიტეთ, ისევ მშობლებმა გავაგრძელოთ სხვების ინფორმირება, ცენტრის მეშვეობით ეს უფრო ორგანიზებულად მოხდება. დაახლოებით 2 თვის მანძილზე მოსამზადებელი სამუშაოები მიმდინარეობდა და დღეს უკვე მზად ვართ სატელეფონო მომსახურება გავუწიოთ მათ,” – აცხადებს ლია ტაბატაძე.

სოფიკო მირზიაშვილი დაუნის სინდრომის მქონე ბავშვის დედაა. როგორ მან ნეტგაზეთს უთხრა, დაუნის სინდრომის შემთხვევაში ადრეული განვითარების სახელმწიფო პროგრამა არსებობს. მისი თქმითვე, მართალია, პროგრამა მთელ ქვეყანაში მოქმედებს, თუმცა სერვისის მიმწოდებელი ცოტა არის, რის გამოც მშობლებს რიგში უწევთ დგომა, რაც ნიშნავს იმას, რომ ამ პროგრამაში დაუნის სინდრომის მქონე ბავშვები დაბადებიდანვე ვერ ხვდებიან.

“ეს პროგრამა 7 წლამდე გრძელდება. რადგან ჩემი შვილი უკვე 7 წლის არის, მალე მისთვის ეს პროგრამა შეწყდება. ისეთი შეგრძნება მაქვს, რომ მაშველი რგოლი წამართვეს, მე კი დამოუკიდებლად ცურვა არ ვიცი. მეტი პროგრამა დაუნის სინდრომის მიმართულებით არ არის. მომსახურეობა არსებობს, მაგრამ რაოდენობრივად ყველას ვერ აკმაყოფილებს. ის ცენტრალური ბიუჯეტიდან ფინანსდება და გვინდა ადრეული განვითარების პროგრამა ადგილობრივი ხელისუფლების მიერ დაფინანსდეს, რადგან ამ შემთხვევაში მეტი შანსია, ეს პროგრამა რეალურად მთელ ქვეყანაზე გავრცელდეს,” – უთხრა სოფიკო მირზიაშვილმა ნეტგაზეთს.

2011 წლის 19 დეკემბერს გაერთიანებული ერების ორგანიზაციის გენერალურმა ასამბლეამ ცნობიერების ამაღლების მიზნით 21 მარტი დაუნის სინდრომის მსოფლიო დღედ გამოაცხადა. 2012 წლიდან ეს დღე მთელს მსოფლიოში ყოველწლიურად აღინიშნება.

• დაუნის სინდრომით ყოველი 800-დან ერთი ბავშვი იბადება.
• დაუნის სინდრომის მქონე ბავშვი შესაძლოა ეყოლოს ნებისმიერ ადამიანს.
• დაუნის სინდრომი დაავადება კი არა, გენეტიკური ცვლილებაა.
• დაუნის სინდრომი არც მემკვიდრეობითია და არც გადამდები.
• დაუნი არ შეიძლება გამოიყენებოდეს დამაკნინებელ სიტყვად – დაუნი არის მეცნიერის გვარი, რომელმაც პირველმა აღწერა ეს სინდრომი.