ახალი ამბები

“არ არის “ბორდერიზაციის” ახალი ნიშნები” – EUMM

15 მარტი, 2019 • 2066
“არ არის “ბორდერიზაციის” ახალი ნიშნები” – EUMM

საქართველოში ევროკავშირის სადამკვირვებლო მისიის ხელმძღვანელი, ერიკ ჰოეგი, ტვიტერზე წერს, რომ ამჟამად ხურვალეთის ტერიტორიაზე “ბოერდერიზაციის” ახალი ნიშნები არ შეინიშნება. ჰოეგი დასძენს, რომ სადამკვირვებლო მისია ამ დროისთვის მიმდებარე ტერიტორიას ზედამხედველობს.

მისივე თქმით, ადგილზე უსაფრთხოების წარმომადგენლები არიან, თუმცა ინციდენტებს ჯერ ადგილი არ ჰქონია.

“ევროკავშირის სადამკვირვებლო მისია ამ დროისთვის აკვირდება დიდი ხურვალეთის მიმდებარე ტერიტორიას. არ არის “ბორდერიზაციის” ახალი ნიშნები. უსაფრთხოების ძალების წარმომადგენლები აქ არიან, თუმცა ჯერჯერობით არცერთი ინციდენტი არ დაგვიფიქსირებია. ყველა მექანიზმი, მათ შორის ცხელი ხაზი, მოქმედებს, რათა უზრუველყოფილი იყოს უკეთესი კომუნიკაცია,” – წერს ერიკ ჰოეგი ტვიტერზე.


სოფელ ხურვალეთის მცხოვრებმა, ლუდა სალიამ ფეისბუკის საკუთარ გვერდზე დღეს, 15 მარტს დაწერა, რომ რუსმა სამხედროებმა სოფლის ბოლო დაიკავეს.

“SOS ვითხოვთ შველას! ხურვალეთში რუსი ოკუპანტები შემოვიდნენ და სოფლის ბოლო დაიკავეს. მოგვხედეთ, გვიშველეთ.! ხურვალეთში რუსი ოკუპანტები დგანან. მოსახლეების ეზოებში”, – წერს სალია.

რადიო თავისუფლების ჟურნალისტი, რომელიც ამჟამად ადგილზე იმყოფება, აცხადებს, რომ ქართული პოლიცია ჟურნალისტებს და შეკრებილ მოქალაქეებს გადაადგილების უფლებას არ აძლევს. ამასთან, სოფელში საქართველოს სპეცრაზმის რამდენიმე მანქანა შევიდა.

ადგილზე იმყოფება ანტიოკუპაციური მოძრაობა “ძალა ერთობაშიას” ლიდერი დავით ქაცარავა, რომელიც საქართველოს მოქალაქეებს ხურვალეთში ჩასვლას მოუწოდებს.

13 მარტს ოსური მხარემ ანტიოკუპაციური მოძრაობის “ძალა ერთობაშია” ლიდერი დავით ქაცარავა პროვოკაციის დაგეგმვაში დაადანაშაულა და გააფრთხილა.

“დავით ქაცარავას ხელმძღვანელობით მოძრაობა “ძალა ერთობაშია” 15 მარტს ხურვალეთში, დე ფაქტო საზღვართან პროვოკაციას გეგმავს. პროვოკატორების მთავარი ამოცანაა, სამხრეთ ოსეთის რესპუბლიკის კანონმდებლობის დარღვევისთვის მათ დასაკავებლად შექმნან წინაპირობები და სახელმწიფო საზღვართან არასტაბილურობის კერა.

მოძრაობის ლიდერი დ. ქაცარავა, რომელსაც პოლიტიკური ქულების დაწერა და დეპუტატობა სურს მომავალ საპარლამენტო არჩევნებზე, მიზანმიმართულად წირავს აქციის მონაწილეებს, რომლებიც შეიძლება დაშავდნენ იმ შემთხვევაში, თუ სიტუაცია კონტროლიდან გამოვა. თუ აქციის მონაწილეები დაარღვევენ სამხრეთ ოსეთის სახელმწიფო საზღვარს, დავაკავებთ კანონმდებლობის შესაბამისად”, – წერია სამხრეთ ოსეთის დე ფაქტო რესპუბლიკის უშიშროების სამსახურის განცხადებაში, რომელიც უწყებამ დღეს, 13 მარტს გაავრცელა.

ამავე თემაზე:

სუს-ი არ ადასტურებს რუსი სამხედროების საქართველოს კონტროლირებად ტერიტორიაზე შემოსვლას

მასალების გადაბეჭდვის წესი