მიტროპოლიტი ანტონი: დეკანოზი მამალაძე უდანაშაულოა და მას შეიწყალებენ

ვანისა და ბაღდათის მიტროპოლიტმა ანტონმა გლდანის სასჯელაღსრულების დაწესებულებიდან გამოსვლის შემდეგ განაცხადა, რომ საპატრიარქო მზად არის, მიმართოს პრეზიდენტს დეკანოზი გიორგი მამალაძის შეწყალების მოთხოვნით. ციხის საავადმყოფოში მიტროპოლიტმა მსჯავრდებული დეკანოზი დღეს მოინახულა.

მიტროპოლიტ ანტონის თქმით, საპატრიარქოს მოთხოვნა დეკანოზის შეწყალებაზე დასაბუთებულია, თუმცა ჯერჯერობით უცნობია კონკრეტული თარიღი, როდის იმსჯელებენ საპატრიარქოში ამ საკითხზე.

მე მოვედი პატიმრის მოსანახულებლად და იმ კითხვებზე პასუხის მისაღებად, რომელიც საჯაროდ განვაცხადე. მიმაჩნია, რომ ეს საკითხი აუცილებლად უნდა განვიხილოთ შიგნით. ჩვენ ამის რესურსიც გვაქვს, შესაძლებლობაც და ძალაც. ეს საკითხი თუნდაც იმისთვის უნდა განვიხილოთ, რომ ერთხელ და სამუდამოდ დასრულდეს თემის ირგვლივ მითქმა-მოთქმა და სპეკულაციები. ეს არის შიდა საკითხები, რომელსაც ეკლესია განიხილავს. საპატრიარქო ყველაფრისთვის მზად არის… მზად არის, რომ ნაბიჯი გადადგას შეწყალების მოთხოვნისთვის”, – განაცხადა ვანისა და ბაღდათის მიტროპოლიტმა.

როგორც მიტროპოლიტი ამბობს, დეკანოზ გიორგი მამალაძის პოზიცია არის ჯანსაღი:

თქვენც იხილავთ მალე – ჩვენ გადავდგამთ ისეთ ნაბიჯს, რომ დეკანოზი იქნება შეწყალებული და მოთხოვნა გაკეთდება. ვფიქრობ, პრეზიდენტი გადადგამს ამ ნაბიჯს. დანარჩებს თქვენ იხილავთ. მსჯავრდებული თავად იტყვის ყველაფერ დანარჩენს. მართალია, მას არ უწყობს ჯანმრთელობა ხელს, თუმცა გამოჯანმრთელდება”.

მიტროპოლიტ ანტონის თქმით, არასწორია ინტერპრეტაცია, თითქოს საპატრიარქომ მსჯავრდებულ დეკანოზს შეწყალებაზე უარი უთხრა. მისი თქმით, დეკანოზ მამალაძისგან მიღებული პასუხების შესახებაც საპატრიარქოს შიგნით იმსჯელებენ.

ვანისა და ბაღდათის მიტროპოლიტი მიიჩნევს, რომ დეკანოზი უდანაშაულოა, ხოლო პატრიარქის პოზიციაც ამ საკითხზე არის დადებითი.

გუშინ, 28 თებერვალს, ციხის საავადმყოფოში ე.წ. ციანიდის საქმეზე მსჯავრდებულ დეკანოზს, გიორგი მამალაძეს საპატრიარქო ტახტის მოსაყდრის, მიტროპოლიტ შიო მუჯირის თანაშემწე და საპატრიარქოს პრესცენტრის ხელმძღვანელი, დეკანოზი ანდრია ჯაღმაიძეც შეხვდა.

მოსაყდრე შიოს თანაშემწე ციხის საავადმყოფოში დეკანოზ მამალაძეს შეხვდა


  • დეკანოზ მამალაძეს თბილისის საქალაქო სასამართლომ 9 წლიანი პატიმრობა 2017 წლის 5 სექტემბერს მიუსაჯა. მას ბრალად პატრიარქ ილია მეორის მდივან–რეფერენტის მკვლელობის მცდელობა დაუმტკიცდა.
  • დეკანოზი გიორგი მამალაძე საქართველოს პროკურატურამ 10 თებერვალს დააკავა თბილისის საერთაშორისო აეროპორტში, როდესაც ის ბერლინში მიემგზავრებოდა, სადაც საქართველოს მართლმადიდებელი ეკლესიის პატრიარქს, ილია მეორეს ოპერაცია უტარდებოდა. პროკურატურის ცნობით, დეკანოზის ბარგის ჩხრეკისას ამოიღეს ფარულად შენახული შხამიანი ნივთიერება -„ნატრიუმის ციანიდი“.
  • პროკურატურის ცნობით, ამ საქმეზე გამოძიება 2017 წლის 2 თებერვალს დაიწყო ჟურნალისტ ირაკლი მამალაძის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების – ციანიდის მოძიებაში დახმარება, რომლის გამოყენებითაც ამ უკანასკნელს, როგორც შეხვედრისას განმცხადებელმა გაარკვია, უნდა მოეხდინა მაღალი იერარქიის სასულიერო პირის სიცოცხლის ხელყოფა.
  • მოგვიანებით პროკურატურამ განმარტა, რომ დეკანოზი გიორგი მამალაძე აპირებდა შორენა თეთრუაშვილის მკვლელობას.
  • 2017 წლის 12 თებერვალს საქართველოს პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით შეეფარდა პატიმრობა.
  • მამალაძე თავდაპირველად ბრალდებული იყო საქართველოს სისხლის სამართლის კოდექსის 18-108-ე (მკვლელობის მომზადება) და 236-ე მუხლებით (ცეცხლასასროლი იარაღის უკანონო შეძენა-შენახვა), რაც სასჯელის სახედ და ზომად ითვალისწინებდა თავისუფლების აღკვეთას ვადით შვიდიდან თხუთმეტ წლამდე. მოგვიანებით, პროკურატურამ მამალაძეს ბრალი დაუმძიმა, კერძოდ, სსკ-ის 18, 109-ე მუხლის მე-3 ნაწილის „გ“ ქვეპუნქტით წარუდგინა ბრალდება (განზრახ მკვლელობის მომზადება ანგარებით), რაც სასჯელის სახედ და ზომად ითვალისწინებდა 16-დან 20 წლამდე თავისუფლების აღკვეთას.
  • საბოლოოდ სასამართლომ ისევ გადააკვალიფიცირა მუხლი 18-108-ზე და სწორედ მკვლელობის მომზადებაში ცნო დეკანოზი დამნაშავედ.
  • თავად დეკანოზი მამალაძე ბრალს არ აღიარებს, მისი თქმით, ციანიდის ყიდვა თავად შორენა თეთრუაშვილმა სთხოვა.
  • დეკანოზ მამალაძის საქმის სასამართლო განხილვა დახურული იყო, ასევე, ადვოკატებს გაუთქმელობის ხელწერილზე აქვთ ხელი მოწერილი, რის გამოც საზოგადოებისთვის უცნობია საქმის მასალები.
ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.