ახალი ამბები

მოსაყდრე შიოს თანაშემწე ციხის საავადმყოფოში დეკანოზ მამალაძეს შეხვდა

28 თებერვალი, 2019 • 1472
მოსაყდრე შიოს თანაშემწე ციხის საავადმყოფოში დეკანოზ მამალაძეს შეხვდა

საპატრიარქო ტახტის მოსაყდრის, მიტროპოლიტ შიო მუჯირის თანაშემწე და საპატრიარქოს პრესცენტრის ხელმძღვანელი, დეკანოზი ანდრია ჯაღმაიძე გუშინ ციხის საავადმყოფოში ე.წ. ციანიდის საქმეზე მსჯავრდებულ დეკანოზს, გიორგი მამალაძეს შეხვდა, რის შესახებაც ტვ პირველთან ინტერვიუში ისაუბრა.

დეკანოზი ანდრია ჯაღმაიძის განცხადებით, თავად გიორგი მამალაძის და მისი ოჯახის წევრების სურვილი იყო, მსჯავრდებული დეკანოზისთვის შვიდგზის ზეთისცხების საიდუმლო საეკლესიო მსახურება შესრულებულიყო, რომელსაც მართლმადიდებელი ეკლესია ხშირად ასრულებს ხოლმე ადამიანის ავადმყოფობის პერიოდში. დეკანოზი ანდრიას თქმით, ამ დროს ლოცულობენ როგორც სულიერი, ასევე ხორციელი ჯანმრთელობისათვის:

ეს ითხოვა გიორგი მამალაძემ და, რა თქმა უნდა, შევედი საავადმყოფოში. ასევე, ვისაუბრეთ განვითარებულ მოვლენებზე. როგორც მოგეხსენებათ, ზუსტად წინა დღეს განცხადება გავაკეთეთ, რომელსაც ზოგიერთი არასწორი ინტერპრეტაციაც მოჰყვა, თითქოს საპატრიარქომ გადაწურა იმედი შეწყალებაზე შუამდგომლობისა. ამ დროს ეს განცხადება ემსახურებოდა ერთი ძირითადი საკითხისადმი სინათლის მოფენას”.

როგორც მოსაყდრე შიოს თანაშემწე ამბობს, საპატრიარქოს განცხადებასთან დაკავშირებით არალოგიკური ქმედება ხორციელდებოდა მსჯავრდებულის ადვოკატების და იმ ადამიანების მხრიდან, რომლებიც დეკანოზ გიორგი მამალაძეს ქომაგობენ:

ეს არალოგიკურობა მდგომაორებს იმაში, რომ, ერთი მხრივ, საპატრიარქოს მისამართით შანტაჟის და მუქარის ენით იყო საუბარი, ხოლო, მეორე მხრივ, საპატრიარქოსაგან თხოულობდნენ შუამდგომლობას შეწყალებაზე. ბოლო სურათმა აჩვენა, რომ ეს იყო მიზანმიმართული სტრატეგია. ასევე, ჩვენ ვხედავდით იმას, რომ საპატრიარქოს არ მისცემოდა საშუალება, დარბილებულიყო ტონი და დაგვეყენებინა შუამდგომლობა იმიტომ, რომ თუ ამ ფონზე საპატრიარქო გადადგამს ნაბიჯს და დააყენებს შუამდგომლობას, მაშინვე წამოვა ახალი კამპანია, თითქოს შანტაჟის ქვეშ, გაუთქმელობის საფასურად გადავდგით ეს ნაბიჯი”.

დეკანოზი ანდრიას განცხადებით,  გიორგი მამალაძეს უთხრა, რომ “მისი საქმე იმ ადამიანების ხელში, ვინც მუდამ ეკლესიის წინააღმდეგ ცდილობდნენ ცილისმწამებლური/დისკრიმინაციული ტალღის აგორებას, იქცა მორიგ ინსტრიმუნტად, რომელთა მიზანია ასეთი მდგომარეობის გაგრძელება იმისთვის, რომ კიდევ დიდხანს იყოს სალაპარაკო დეკანოზ მამალაძის საკითხი”.

როგორც მოსაყდრე შიოს თანაშემწე ამბობს, არ წაუკითხავს დეკანოზ გიორგი მამალაძის წერილი, თუმცა მიიჩნევს, რომ არაფერია იქ ეკლესიის საწინააღმდეგო და ის, რისი შიშიც უნდა ჰქონდეს თითქოს ეკლესიას:

იმ მხრიდან, ვინც დააყენა ეს საკითხი, თავად ისინი ლაპარაკობენ ამ წერილის აბსურდულობაზე, თითქოს მამა გიორგიმ დაწერა რაღაც განსაკუთრებული ფსიქოლოგიური სტრესის ქვეშ. ამიტომ ეს წერილი საყურადღებო არც უნდა იყოს და არ უნდა გამოქვეყნდეს. საპატრიარქოს განცხადებასთან დაკავშირებით მამა გიორგის და მის ოჯახსაც ვესაუბრე მანამდეც და მერეც. მათ კარგად ესმით, რომ როდესაც საუბარია ბრალეულობის წილის აღიარებაზე, აქ საუბარი არ არის საკანონმდებლო კუთხით რაღაც პირობაზე, რომ ეს უნდა აღიაროს, არამედ ეს არის სულიერ საკითხზე – ის, რაც მხოლოდ საეკლესიო კუთხით შეიძლება განიხილებოდეს, როგორც დანაშაული და გადაცდომა”.

რა წერია წერილში, რომელიც “ციანიდის საქმეზე” დაკავებულმა დეკანოზმა მღვდელმთავრებს 2017 წელს გაუგზავნა და ერთ-ერთი ადრესატის თქმით, ფარულ მუქარას შეიცავს და “საეკლესიო ბედუკაძეობას” ნიშნავს?

წერილი, რომელიც ამჟამად მღელვარების და განხილვის თემაა, დეკანოზმა გიორგი მამალაძემ 2017 წლის გაზაფხულზე 4 მღვდელმთავრის სახელზე ციხიდან გაგზავნა. წერილის არსებობას, რომლის შინაარსიც უცნობია, ადასტურებენ როგორც დეკანოზის ოჯახის წევრები და ადვოკატები, ასევე, სასულიერო პირების ნაწილიც.

ვინ რა (არ) იცის დეკანოზის “სკანდალურ წერილზე”

საპატრიარქომ დეკანოზ გიორგი მამალაძის მიერ მღვდელმთავრებისთვის გაგზავნილი წერილის და მისი საქმის მასალების გამოქვეყნება მოითხოვა.


  • დეკანოზ მამალაძეს თბილისის საქალაქო სასამართლომ 9 წლიანი პატიმრობა 2017 წლის 5 სექტემბერს მიუსაჯა. მას ბრალად პატრიარქ ილია მეორის მდივან–რეფერენტის მკვლელობის მცდელობა დაუმტკიცდა.
  • დეკანოზი გიორგი მამალაძე საქართველოს პროკურატურამ 10 თებერვალს დააკავა თბილისის საერთაშორისო აეროპორტში, როდესაც ის ბერლინში მიემგზავრებოდა, სადაც საქართველოს მართლმადიდებელი ეკლესიის პატრიარქს, ილია მეორეს ოპერაცია უტარდებოდა. პროკურატურის ცნობით, დეკანოზის ბარგის ჩხრეკისას ამოიღეს ფარულად შენახული შხამიანი ნივთიერება -„ნატრიუმის ციანიდი“.
  • პროკურატურის ცნობით, ამ საქმეზე გამოძიება 2017 წლის 2 თებერვალს დაიწყო ჟურნალისტ ირაკლი მამალაძის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების – ციანიდის მოძიებაში დახმარება, რომლის გამოყენებითაც ამ უკანასკნელს, როგორც შეხვედრისას განმცხადებელმა გაარკვია, უნდა მოეხდინა მაღალი იერარქიის სასულიერო პირის სიცოცხლის ხელყოფა.
  • მოგვიანებით პროკურატურამ განმარტა, რომ დეკანოზი გიორგი მამალაძე აპირებდა შორენა თეთრუაშვილის მკვლელობას.
  • 2017 წლის 12 თებერვალს საქართველოს პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით შეეფარდა პატიმრობა.
  • მამალაძე თავდაპირველად ბრალდებული იყო საქართველოს სისხლის სამართლის კოდექსის 18-108-ე (მკვლელობის მომზადება) და 236-ე მუხლებით (ცეცხლასასროლი იარაღის უკანონო შეძენა-შენახვა), რაც სასჯელის სახედ და ზომად ითვალისწინებდა თავისუფლების აღკვეთას ვადით შვიდიდან თხუთმეტ წლამდე. მოგვიანებით, პროკურატურამ მამალაძეს ბრალი დაუმძიმა, კერძოდ, სსკ-ის 18, 109-ე მუხლის მე-3 ნაწილის „გ“ ქვეპუნქტით წარუდგინა ბრალდება (განზრახ მკვლელობის მომზადება ანგარებით), რაც სასჯელის სახედ და ზომად ითვალისწინებდა 16-დან 20 წლამდე თავისუფლების აღკვეთას.
  • საბოლოოდ სასამართლომ ისევ გადააკვალიფიცირა მუხლი 18-108-ზე და სწორედ მკვლელობის მომზადებაში ცნო დეკანოზი დამნაშავედ.
  • თავად დეკანოზი მამალაძე ბრალს არ აღიარებს, მისი თქმით, ციანიდის ყიდვა თავად შორენა თეთრუაშვილმა სთხოვა.
  • დეკანოზ მამალაძის საქმის სასამართლო განხილვა დახურული იყო, ასევე, ადვოკატებს გაუთქმელობის ხელწერილზე აქვთ ხელი მოწერილი, რის გამოც საზოგადოებისთვის უცნობია საქმის მასალები.

მასალების გადაბეჭდვის წესი