იაპონელმა მეთევზეებმა ღრმა წყლების ბინადარი ორი თასმა-თევზი დაიჭირეს. როგორც CNN წერს, თევზის ეს სახეობა იშვიათია. ისინი ღრმა წყლებში ბინადრობენ და უძველესი დროიდან, ადგილობრივი მოსახლეობა მათ მიწისძვრისა და ცუნამის მაცნედ მიიჩნევს.
გამოცემის ცნობით, ერთ-ერთი თასმა-თევზის სიგრძე 3.6 მეტრს შეადგენდა, მეორე კი 4 მეტრის სიგრძის იყო. ისინი იაპონიის სამხრეთ-დასავლეთ ნაწილში მდებარე კუნძულის სიახლოვეს იპოვეს.
ერთ-ერთი თასმა-თევზი გემზე ამოყვანისას შუაზე გაწყდა და ერთ-ერთმა მეთევზემ შეჭამა, მეორე კი პორტში მიყვანის შემდეგ მოკვდა.
როგორც CNN წერს, 2019 წლის დანმავლობაში იაპონიასა და პერუში ხმელეთზე რამდენიმე მკვდარი თასმა-თევზი გამოირიყა. ადგილობრივების რწმენით, ეს შესაძლოა მიწისძვრის ან ცუნამის მოახლოებაზე მიანიშნებდეს.
იაპონიაში თევზის ამ სახეობას “Ryugu no tsukai”-ს უწოდებენ, რაც ზღვის ღმერთის სასახლის მაცნეს ნიშნავს. ლეგენდის მიხედვით, თასმა-თევზი მიწისძვრის მოახლოებისას ნაპირზე ირიყება.
მათ განსაკუთრებული ყურადღება მას შემდეგ მიაქციეს, რაც 2011 წელს ფუკუშიმას მიწისძვრასა და თანმხლები ცუნამის შედეგად 20 000-ზე მეტი ადამიანი დაიღუპა. ამ მოვლენას კი ერთი წლით წინ უსწრებდა ხმელეთზე ათობით თასმა-თევზის გამორიყვა.
მიუხედავად იაპონელების ამგვარი რწმენისა, მეცნიერები ლეგენდის მართებულობას უარყოფენ.
![„გავლენას იქონიებს [გაწევრიანების] პროცესზე“ — შარლ მიშელი „რუსულ კანონზე“](https://netgazeti.ge/wp-content/uploads/2023/05/charles.jpg "„გავლენას იქონიებს [გაწევრიანების] პროცესზე“ — შარლ მიშელი „რუსულ კანონზე“")
