მეთოფიშვილმა უნამუსოები და ფსიქიკური აშლილობის მქონე პირები ერთ კონტექსტში მოიხსენია

იუსტიციის საბჭოს წევრმა მოსამართლემ, სერგო მეთოფიშვილმა სალანძღავ კონტექსტში გამოიყენა სიტყვათშეთანხმება “ფსიქიკური ჯანმრთელობა და გონებრივი პათალოგიები”.

18 თებერვალს, ფეისბუკზე სასამართლო სისტემის შესახებ ჩატარებულ კვლევაზე საუბრისას, მეთოფიშვილმა ასეთი რამ დაწერა:

“კვლევა [რომელიც სასამართლო სისტემას ეხება] ჩაატარა მსოფლიოში ერთ-ერთმა ყველაზე ავტორიტეტულმა და მსოფლიოში აღიარებულმა ორგანიზაციამ… აღნიშნულ ფაქტორს აქვს უდიდესი მნიშვნელობა იმ თვალსაზრისით, რომ ამ კვლევის სანდოობას ვერავინ ეჭვქვეშ ვერ დააყენებს! მე არ ვგულისხმობ უნამუსო და უღირს მატყუარებს, ადამიანებს ფსიქიკური დარღვევებით ან გონებრივი პათალოგიებით“.

ნეტგაზეთს მეთოფიშვილთან კომენტარის ჩაწერა სურდა განმარტებებისთვის, თუმცა ჩვენს ზარს და შეტყობინებებს არ უპასუხა. იუსტიციის საბჭოს პრესსამსახურში ნეტგაზეთს უთხრეს, რომ იგი ამ თემასთან დაკავშირებით კომენტარს არ გააკეთებს.

დაავადებათა კონტროლისა და საზოგადოებრივი ჯანმრთელობის დაცვის ცენტრის განმარტებით, არსებობს მრავალი სახის ფსიქიკური აშლილობა, რომლებიც სხვადასხვანაირად იჩენს თავს; ჟურნალისტური ეთიკის ქარტიის თანახმად კი, საზოგადოებაში არსებული სტიგმა ამგვარი პრობლემის მქონე ადამიანებს ხშირად ხელს უშლის, მიიღონ ქვეყანაში არსებული სერვისები.

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია 2018 წლის 1 სექტემბრიდან არის ნეტგაზეთის რეპორტიორი. ის ადრეც მუშაობდა ნეტგაზეთში — 2016 წლის მაისიდან 2017 წლის თებერვლამდე. Email: lukapertaia@gmail.com