სააკაშვილი უკრაინულ არხზე წაიყვანს გადაცემას “ჯოკრები. გზა პრეზიდენტობისკენ”

საქართველოს ყოფილი პრეზიდენტი მიხეილ სააკაშვილი უკრაინულ ტელეარხ ZIK-ზე წაიყვანს ტელეგადაცემას, სახელად “ჯოკრები. გზა პრეზიდენტობისკენ (“Джокери. Шлях у президенти”).

ამის შესახებ თავად ZIK-ის ვებგვერდი იუწყება. გადაცემა 7 დეკემბრიდან ყოველ პარასკევს, კიევის დროით 18:30 საათზე გავა ეთერში.

გადაცემაში სააკაშვილი, სავარაუდოდ, ისაუბრებს 2019 წლის საპრეზიდენტო არჩევნების კანდიდატების შესახებ. საპრეზიდენტო არჩევნები უკრაინაში 2019 წლის 31 მარტსაა ჩანიშნული. პრეზიდენტს 5-წლიანი ვადით ირჩევენ.

გადაცემა, რომელიც ტელეარც ZIK-ისა და ინტერნეტგამოცემა Украинская правда-ს პროქტია, 2017 წლიდან გადის, რომელიც აქამდე უკრაინელ ჟურნალისტ სევგილ მუსაევას მიჰყავდა.

არხის ერთ-ერთმა ხელმძღვანელმა, ოლგა მოვჩანმა, განაცხადა, რომ პროექტის გაგრძელებას მუსაევასთან ერთად გეგმავდნენ, თუმცა იგი აშშ-ში გაემგზავრა სასწავლებლად, რის გამოც “გამორჩეული პიროვნების” ძებნა დაიწყეს.

“სააკაშვილი — [არის] პრეზიდენტი, რომელმაც ფსკერიდან ამოიყვანა საკუთარი ქვეყანა და კარგად იცნობს უკრაინის პოლიტიკის კულისებს. ცხადია, ის არ არის უბრალო წამყვანი. მისი კომენტარები ჩვენს პროექტში – ეს არის მისი ხედვა და დამოკიდებულება სიტუაციებისა და ადამიანების მიმართ. ის არ არის ადამიანი, რომელიც ობიექტური ჟურნალისტიკის ტექსტს წაიკითხავს”, – განაცხადა მოვჩანმა.


საქართველოდან გამგზავრების შემდეგ, 2015-16 წლებში სააკაშვილი უკრაინაში ოდესის გუბერნატორად მსახურობდა მანამ, სანამ სტუდენტობის მეგობართან, უკრაინის პრეზიდენტ პეტრო პოროშენკოსთან დაპირისპირება მოუვიდა. ამის შემდეგ მან დააარსა ოპოზიციური პარტია “ახალი ძალების მოძრაობა”. 2018 წელს იგი უკრაინიდან გააძევეს.

ZIK-ის ცნობით, სააკაშვილი ამჟამად ნიდერლანდებში იმყოფება.

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.