“ჩვენ საკმაოდ დეტალური ინფორმაცია გვაქვს ამ მხრივ, რომელსაც პერიოდულად ძალიან დეტალურად ვაცნობთ საერთაშორისო ორგანიზაციებს. დისკუსიების ფორმატის არსებობის ერთ-ერთი მიზეზი სწორედ ესაა – უსაფრთხოებისა და ჰუმანიტარული ვითარების განხილვა რეგიონებში. იქ ბევრი საკითხის მოგვარებას ვცდლობთ,  მაგალითად, კრიმინალური ვითარების დარეგულირებას, დაკავებებს, სამედიცინო საკითხებს. რაღაც მცირე პროგრესი ამ მხრივ გვაქვს,”- განაცხადა ციხელაშვილმა. 

 

რაც შეეხება პასპორტების თემას, ციხელაშვილი ამბობს:

“ასეთი ჯგუფი რომ არსებობს, არ არის ახალი და არ გაგვკირვებია ის, რაც გაჟღერდა. სამწუხაროდ, პოლიტიკურ დაპირისპირებაში ეს თემა კარგა ხანია მუსირებს. პოლიტიკური თამაშის საგანია, რომელიც ცალსახად დასაგმობია. იგივე ჟენევაში მე პირადად ამაზე ყოველთვის ვსაუბრობ, რომ ჰუმანიტარული თვალსაზრისით მოსახლეობისთვის, რომელიც ცხოვრობს ჩემ მიერ დასახელებულ რაიონებში, არ მოხდეს მათი დისკრიმინაცია ამ ნიშნით.  იმ პასპორტებზე [აფხაზურ], რომელთაც ლეგიტიმურობა არ აქვთ, ცხადია, სამართლებრივად არ ვდავობთ – ეს არის ჰუმანიტარული საკითხი, რომელსაც გარკვეული უფლებები ებმის, მაგალითად, გადაადგილების თუ სხვა ტიპის უფლებები.”

აფხაზეთის მოსახლეობის აღწერის მონაცემებით, რომელიც 2011 წელს ჩატარდა, გალის რაიონში სულ 30 356 ადამიანი ცხოვრობს, აქედან მოსახლეობის ყველაზე დიდ რაოდენობას ეთნიკურად ქართველები წარმოადგენენ – 27 776. დანარჩენი მოსახლეობა კი ასე ნაწილდება – აფხაზები – 208, რუსები – 188, სომხები -26 და ა.შ. 

4 აპრილს აფხაზეთის პარლამენტმა ერთხმად მიიღო დადგენილება, რომელიც ეხება გალის, ტყვარჩელის და ოჩამჩირის მოსახლეობის პასპორტიზაციის საკითხის მოწესრიგებას. ოპოზიციონერთა განმარტებით, უკანონო იყო დოკუმენტების გაცემა საქართველოს მოქალაქეებზე (კანონი ნამდვილად კრძალავს ორმაგ მოქალაქეობას ყველა ქვეყანასთან, გარდა რუსეთისა), რომლებმაც, უბრალოდ, განცხადებები დაწერეს საქართველოს მოქალაქეობაზე უარის თქმის თაობაზე. ამავე დღეს მიიღეს ნორმატიული დადგენილება (რომლის აღსრულებაც სავალდებულოა), სადაც ჩაიწერა, რომ ყველა პასპორტი, რომელიც გაიცა კომისიების მიერ ამ სამ რაიონში, ითვლება “დადგენილი პროცედურების დარღვევით გაცემულად და მათ არ შეუძლიათ აფხაზეთის რესპუბლიკის მოქალაქეობის დადასტურება”.

	მასალა მომზადებულია პროექტ “სამხრეთ კავკასიის ამბების” ფარგლებში ჰაინრიჰ ბიოლის ფონდის მხარდაჭერით. პროექტის ფარგლებში მომზადებული ტექსტები შეიცავს იმ ტერმინოლოგიას, რომელიც აფხაზეთის, სამხრეთ ოსეთის და მთიანი ყარაბაღის თვითაღიარებულ რესპუბლიკებში გამოიყენება. მასალებში გამოთქმული მოსაზრებები შესაძლოა არ ემთხვეოდეს ჰაინრიჰ ბიოლის ფონდის და ნეტგაზეთის პოზიციას.