ავთანდილ კენჭაძე. ფოტო: ჭიდაობის ფედერაცია

ძმის შემდეგ, მოჭიდავე ავთანდილ კენჭაძეც მსოფლიო ჩემპიონი გახდა

საქართველოს თავისუფალი სტილით მოჭიდავეთა ნაკრების წევრი ავთანდილ კენჭაძე(74კგ.) მსოფლიო ჩემპიონია.

თავისუფალი სტილით მოჭიდავეთა შორის 23-წლამდელთა მსოფლიო ჩემპიონატის მეორე დღეს, ბუქარესტში, საქართველოს ნაკრების წევრმა რუმინელი მეტოქე, ვასილიოღლუ, ანგარიშით 8:0 დაამარცხა და ოქროს მედალი მოიპოვა.

ჭიდაობის ფედერაციის ცნობით, კენჭაძემ საფინალო გზაზე ინდოელი მალიკი 10-0, სლოვაკეთის წარმომადგენელი გულაევი 3-0 და თურქი აკდენიზი 10-0 დაამარცხა, ნახევარფინალში კი რუსეთის ნაკრების წევრ ტიმურ ბიზოევს 4-2 მოუგო.

ერთი დღით ადრე, ამავე სტილით ჭიდაობაში, 23-წლამდელთა შორის მსოფლიო ჩემპიონი გახდა ავთანდილ კენჭაძის ძმაც – ნიკოლოზ კენჭაძე(79კგ). მან რუსეთის ნაკრების წევრი გაჯი ნაბიევი 3-0 დაამარცხა. ამავე დღეს, ასევე მსოფლიო ჩემპიონის ტიტული მოიპოვა გივი მაჭარაშვილმა(97კგ).

მანამდე, 13 ნოემბერს მსოფლიო ჩემპიონის ტიტული ბერძნულ-რომაული სტილით მოჭიდავე ნუგზარ წურწუმიამ(55კგ) მოიპოვა; 13 ნოემბერსვე, მსოფლიოს ექვსგზის ჩემპიონი გახდა ამავე სტილით მოჭიდავე ზვიად პატარიძე(130კგ), მომდევნო დღეს კი ოქროს მედალი გელა ბოლქვაძემ მიიღო(82კგ).

ნეტგაზეთის მასალების სხვა გამოცემებში გადაბეჭდვის წესი


ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან