ახალი ამბები

საქართველოში ქალები კონკრეტულ პრობლემას არ აწყდებიან – მოსახლეობის 1/3

16 ნოემბერი, 2018 • 1571
საქართველოში ქალები კონკრეტულ პრობლემას არ აწყდებიან – მოსახლეობის 1/3

მოსახლეობის 1/3 მიიჩნევს, რომ საქართველოში ქალები რაიმე კონკრეტულ პრობლემას არ აწყდებიან – ამის შესახებ საუბარია კვლევაში, რომელიც მოამზადა “კავკასიის კვლევითი რესურსების ცენტრმა” (CRRC-საქართველო) ევროპის საბჭოს დაკვეთითა და დანიის საგარეო საქმეთა სამინისტროს დაფინანსებით.

კვლევის მიხედვით, მოსახლეობის 34% მიიჩნევს, რომ საქართველოში ქალები რაიმე კონკრეტულ პრობლემას არ აწყდებიან, ხოლო 12-მა პროცენტმა განაცხადა, რომ არ იცის, ჩამოთვლილთაგან რომელი წარმოადგენს მნიშვნელოვან პრობლემას ქალებისთვის.

მოსახლეობის იმ ნაწილმა, რომელმაც კითხვაზე პასუხად კონკრეტული პრობლემა დაასახელა, ყველაზე ხშირად მიუთითა ოჯახში ძალადობა (34%). ასევე ხშირად დასახელდა სექსუალური შევიწროება (18%) და დამსაქმებლის პრიორიტეტები ახალი თანამშრომლების აყვანის პროცესში (11%).

კვლევის ავტორების განცხადებით, ქალებისა და მამაკაცების მოსაზრება იმ გამოწვევებთან დაკავშირებით, რომლებსაც საქართველოში ქალები აწყდებიან, ერთმანეთისგან მნიშვნელოვნად განსხვავდება.

კერძოდ, მამაკაცების 41% აცხადებს, რომ ქალები პრობლემებს არ აწყდებიან. ამ მოსაზრებას გაცილებით ნაკლები ქალი (28%) ეთანხმება. ქალები ყველაზე ხშირად ყურადღებას ამახვილებენ ოჯახში ძალადობასა (40%) და სექსუალურ შევიწროებაზე (23%).


“CRRC-საქართველომ” კვლევა შერეული მეთოდების გამოყენებით ჩააატრა. თვისებრივი მონაცემების შესაგროვებლად კვლევა ითვალისწინებდა ჩაღრმავებულ ინტერვიუებსა და ფოკუსჯგუფებს უმცირესობების სხვადასხვა ჯგუფისა და ეთნიკური ქართველების მონაწილეობით.

რაც შეეხება რაოდენობრივი მონაცემების შეგროვებას, ამ მიზნით, “CRRC-საქართველომ “ქვეყნის მასშტაბით ჩაატარა წარმომადგენლობითი კვლევა, რომლის მიღწეული შერჩევის ზომაც იყო 2 205 რესპონდენტი, ხოლო საშუალო ცდომილების ზღვარი – 2.9%. შერჩევა მოიცავდა საქართველოს იმ ტერიტორიების წარმომადგენლობით სამიზნე ჯგუფებს, სადაც მოსახლეობის ძირითადი ენაა სომხური ან აზერბაიჯანული.

კვლევა,  წარმომადგენლობითია ქვეყნის მასშტაბით. გამოკითხვა 2018 წლის აგვისტოში ჩატარდა.

მასალების გადაბეჭდვის წესი