ევროპარლამენტმა ასოცირების შეთანხმების შესრულების ანგარიში მიიღო

ევროპარლამენტმა საქართველო-ევროკავშირის ასოცირების შეთანხმების შესრულების შესახებ რეზოლუცია 528 ხმით 97-ის წინააღმდეგ მიიღო.

ანდრეი მამიკინსის მიერ მომზადებული დოკუმენტი დადებითად აფასებს საქართველოს მიერ ასოცირების შეთანხმების იმპლემენტაციის პროცესში განხორციელებულ რეფორმებს და ამ პროცესში არსებულ მიღწევებზე და გამოწვევებზე მიუთითებს.

რეკომენდაციათა დიდი ნაწილი კანონის უზენაესობასა და ეფექტურ მმართველობას ეხება. ამ კონტექსტში, ევროპარლამენტი  მოუწოდებს საქართველოს ხელისუფლებას:

  • ანტიკორუფციული სააგენტო სახელმწიფო უსაფრთხოების სამსახურიდან გამოყოს და დამოუკიდებელ უწყებად ჩამოაყალიბოს;
  • შექმნას ეფექტური მექანიზმი სახელმწიფო უწყებების ოფიციალურ პირთა მიერ ძალაუფლების გადამეტების შემთხვევების გამოსაძიებლად;
  • უზრუნველყოს სასამართლო სისტემის მეტი გამჭვირვალობა და დამოუკიდებლობა;
  • გააუმჯობესოს საჯარო ფინანსების მართვის სისტემის რეფორმის აღსრულება;
  • განიხილოს ცვლილებათა პაკეტი, რომელიც მიზნად ისახავს ნარკოპოლიტიკის რეფორმას, საკონსტიტუციო სასამართლოს 2017 წლის 30 ნოემბრის გადაწყვეტილების შესაბამისად.

ადამიანის უფლებათა და ფუნდამენტურ თავისუფლებათა ნაწილში პირველი პარაგრაფი აზერბაიჯანელი ჟურნალისტის, აფგან მუხთარლის საქმეს ეთმობა. ევროპარლამენტი შეშფოთებას გამოთქვამს გამოძიების პროცესში პროგრესის არარსებობის გამო და საქართველოს ხელისუფლებას მოუწოდებს, მის ტერიტორიაზე უსაფრთხო გარემოს შექმნას მსგავსი ფაქტების თავიდან აცილების მიზნით.

ევროპარლამენტი ასევე მოუწოდებს ხელისუფლებას:

  • გააუმჯობესოს ადამიანის უფლებათა დაცვის მექანიზმი და ამ კუთხით სხვადასხვა საზოგადოებრივ ჯგუფებთან ითანამშრომლოს. შექმნას უსაფრთხო გარემო ქვეყნის შიგნით მომუშავე უფლებადამცველებისთვის;
  • გადადგას ნაბიჯები დაუცველი ჯგუფების ფუნდამენტური თავისუფლებების დასაცავად სიძულვილის ენასთან და დისკრიმინაციასთან ბრძოლით, მათ შორის, შრომის ბაზარზე, ლგბტქი ადამიანების, განსაკუთრებული საჭიროებების მქონე პირებისა და უმცირესობების მიმართ;
  • გადადგას ნაბიჯები ქალთა დასაცავად ყველა სახის ძალადობისა და სექსუალური შევიწროებისგან და გაზარდოს მათი მონაწილეობა როგორც პოლიტიკაში, ისე შრომის ბაზარზე;
  • ხაზი გაუსვას თავისუფალი, დამოუკიდებელი და პლურალისტური მასმედიის მნიშვნელობასა და საკვანძო დემოკრატიულ პრინციპებს.

ევროპარლამენტის შეფასებები და რეკომენდაციები ასევე შეეხება შრომის ბაზარსაც. მოწოდებები ძირითადად ეხება ბავშვთა შრომის, შრომის ინსპექციის გაუმჯობესებისა და პროფესიული კავშირების თავისუფლების მიმართულებით.

გარემოს დაცვისა და ენერგეტიკის მიმართულებით ევროპარლამენტი მოხარულია საქართველოსა და ევროკავშირის თანამშრომლობით, თუმცა მთავრობას მოუწოდებს, ნაბიჯები გადადგას ენერგოდამოუკიდებლობის, განახლებადი ენერგიისა და კანონმდებლობის შესაბამისად დახვეწის კუთხით.

ევროპარლამენტი მოუწოდებს საქართველოს ხელისუფლებას, უზრუნველყოს, რომ ევროინტეგრაციაზე მომუშავე სტრუქტურულ ერთეულებს ყველა სამინისტროში საჭირო რაოდენობის კვალიფიციური თანამდებობის პირები ეყოლება.

რეზოლუციიდან ამოღებულ იქნა ჩანაწერი შავ ზღვის უნივერსიტეტზე ზეწოლის შესახებ. შესწორების ინიციატორი ევროდეპუტატი რებეკა ჰარმსი იყო.  მისი თქმით, საქართველოსა და სხვა ქვეყნების მიმართ თურქეთიდან დიდი ზეწოლა მიმდინარეობს, ძირითადად, სკოლებისა და უნივერსიტეტების მიმართულებით. დეპუტატმა ხაზი გაუსვა, რომ შავი ზღვის უნივერსიტეტი ასევე იყო მსხვერპლი, თუმცა ამ ეტაპზე პრობლემა აღმოფხვრილია.

 

ნეტგაზეთის მასალების სხვა გამოცემებში გადაბეჭდვის წესი


ავტორი