ნაძვის ხის დადგმას აპირებენ და აქციის ადგილის შეცვლას გვაიძულებენ — სარალიძე

ზაზა სარალიძე აცხადებს, რომ თბილისის მერიისგან მიიღო გაფრთხილება, შეცვალოს აქციის ადგილი, რადგან მერია პარლამენტთან საახალწლოდ ნაძვის ხის აღმართვას აპირებს.

ზაზა სარალიძე და მალხაზ მაჩალიკაშვილი, რომლებიც მესამე თვეა, შვილების მკლელობის გამოძიების მოთხოვნით პარლამენტთან აქციებს მართავენ, არ აპირებენ პროტესტის შეწყვეტას და მერიის მოთხოვნის შესრულებას.

როგორც 9 ნოემბერს სარალიძემ თქვა, 1 ნოემბერს თბილისის მერიას მიმართა აქციების გაგრძელების ნებართვისთვის 31 დეკემბრამდე. მისივე თქმით, პასუხად მიიღო შეტყობინება, რომ საახალწლო სამზადისის გამო აქციის ადგილმდებარეობა უნდა შეცვალოს, “იქიდან გამომდინარე, რომ აქ აპირებენ ნაძვის ხის აღმართვას”.

“[ამ წერილით] პირდაპირ გვითხრა დღეს ხელისუფლებამ, სადაც გინდათ, იქ იყავით, ჩვენ არანაირი ნაბიჯს არ გადავდგამთ თქვენს მოთხოვნაზეო. არ მისცემენ პასუხისგებაში ჩვენი შვილების მკვლელებს და საერთოდ არაფრის გამოძიებას არ აპირებენ. ეს წერია პირდაპირ ამ წერილში”,- თქვა სარალიძემ.

“აქედან ფეხს არ გავადგამთ არსად”, — თქვა მაჩალიკაშვილმა.

სარალიძე-მაჩალიკაშვილს დღემდე არ აძლევენ პარლამენტთან კარვის აღმართვის უფლებას.

ნეტგაზეთი” დაუკავშირდა თბილისის მერიას კომენტარისათვის. მათი თქმით, ამ საკითხზე კომენტარს, სავარაუდოდ, თბილისი მერი კახი კალაძე გააკეთებს.

გასაყოფი არაფერი შეიძლება გვქონდეს — მაჩალიკაშვილი რობაქიძე-გირგვლიანის ოჯახებზე

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.