ახალქალაქის ინციდენტზე ხუთივე ბრალდებულს სასამართლომ გირაო შეუფარდა

“ნაციონალური მოძრაობის” შტაბში მომხდარ ინციდენტთან დაკავშირებით ახალქალაქის სასამართლომ ხუთივე ბრალდებულს გირაო 3 ათასი ლარი შეუფარდა. პროკურატურა ბრალდებულების მიმართ აღკვეთის ღონისძიების სახით გირაოს გამოყენებას ითხოვდა.

“სასამართლომ ჩვენი შუამდგომლობა განიხილა და სრულად დააკმაყოფილა,”-აცხადებს საქმის პროკურორი გიორგი ორჯონიკიძე.

ბრალდებულების ადვოკატი ახალქალაქის რაიონული სასამართლოს მიერ მიღებულ გადაწყვეტილებას სააპელაციო სასამართლოში გაასაჩივრებს. კახაბერ ასპანიძის თქმით, საქმის მასალებიდან ჩანს, რომ ორ ბრალდებულს კონფლიქტში მონაწილეობა საერთოდ არ მიუღია და მათ მიმართ სისხლის სამართლებრივი დევნა უნდა შემწყდარიყო.

“რაც შეეხება დანარჩენ სამ ბრალდებულს, მათ მიმართ აღკვეთის ღონისძიება არ უნდა გამოყენებულიყო, რადგან ეს ადამიანები დანაშაულს არ ჩაიდენდნენ”,-ამბობს ადვოკატი.

გაერთიანებული ოპოზიცია აცხადებს, რომ 30 ოქტომბერს ახალქალაქში მდებარე გრიგოლ ვაშაძის შტაბი მმართველი პარტიის 30-მდე აქტივისტმა დაარბია. ინციდენტის შედეგად რამდენიმე ადამიანი დაშავდა, რომლებიც საავადმყოფოში გადაიყვანეს. მომხდართან დაკავშირებით პროკურატურამ ბრალი 5 პირს წაუყენა.

პროკურატურის ინფორმაციით, თავდაპირველად გამოძიება სსკ-ს 239-ე მუხლის მეორე და მესამე ნაწილებით მიმდინარეობდა, რაც გულისხმობს ხულიგნობას ცეცხლსასროლი იარაღის ან იარაღად სხვა საგნის გამოყენებით, ჩადენილს წინასწარი შეთანხმებით ჯგუფის მიერ. თუმცა მუხლი გადაკვალიფიცირდა და ამჟამად საქმეს სსკ-ს 126-ე, ძალადობის მუხლით იძიებენ.

“ქართული ოცნების” მაჟორიტარი დეპუტატი ნინოწმინდაში, ენზელ მკოიანი გამორიცხავს ინციდენტის პროვოცირებას მმართველი პარტიის წევრების მიერ.

ნეტგაზეთის მასალების სხვა გამოცემებში გადაბეჭდვის წესი


ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.