სომხეთში ამნისტიის კანონი მიიღეს, რომელიც ათასობით ადამიანს შეეხება

სომხეთის ეროვნულმა ასამბლეამ (პარლამენტმა) პირველი მოსმენით მიიღო კანონი ამნისტიის შესახებ, რომლის ძალითაც, სავარაუდოდ, ციხიდან გამოუშვებენ რადიკალური ჯგუფის, “სასნა ცრერის” წევრებს.

105-დან 72-მა პარლამენტარმა მხარი დაუჭირა კანონპროექტს. მეორე მოსმენა 1 ნოემბერსაა ჩანიშნული.

იუსტიციის მინისტრის მოვალეობის შემსრულებელმა არტაკ ზეინალიანმა განაცხადა, რომ ამნისტია სხვადასხვა კუთხით ათასობით ადამიანს შეეხება.

მისი ცნობით, უშუალოდ პატიმრობიდან გათავისუფლდება 660 ადამიანი.

ზოგიერთ მსჯავრდებულს შეუმცირდება მოსახდელი წლების რაოდენობა. ზოგიერთ შემთხვევაში კი შეჩერდება ისეთი საქმეების წარმოება, რაც დასრულებული არ არის.

ამჟამად სომხეთის ციხეებში 2 900-მდე მსჯავრდებული იხდის სასჯელს.

ამნისტია შეეხება რადიკალური დაჯგუფება “სასნა ცრერის” წევრებსაც. ეს ის ჯგუფია, რომლებმაც 2016 წლის ზაფხულში ერევნის ერებუნის რაიონში 2 კვირით აიყვანეს პოლიციელები მძევლად. მათი მოთხოვნა იყო, გაეთავისუფლებინათ მოძრაობა “დამფუძნებელი პარლამენტის” ლიდერი ჟირაირი საფილიანი. მოვლენები ცნობილია ერევნის კრიზისის სახელით.

ამნისტია არ ეხება მძიმე დანაშაულებს.

ამნისტიის კანონის მიღება ერევნის დაარსების 2800-ე და სომხეთის პირველი რესპუბლიკის დაარსების მე-100 წლისთავს დაამთხვიეს.

მასალა მომზადებულია რადიო თავისუფლებლის ერევნის ბიუროს მასალებზე დაყრდნობით

გარეკანის ფოტო: რადიო თავისუფლების ერევნის ბიურო

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.