რუსეთის ეკლესია სრულად წყვეტს კავშირს კონსტანტინეპოლის საპატრიარქოსთან

15 ოქტომბერს რუსეთის მართლმადიდებელი ეკლესიის სინოდმა მიიღო გადაწყვეტილება, სრულად გაწყვიტოს კავშირი კონსტანტინეპოლის მსოფლიო საპატრიარქოსთან.

სინოდის წევრების განცხადებით, “შეუძლებელია, გაგრძელდეს მათი ევქარისტული ურთიერთობა კონსტანტინეპოლის საპატრიარქოსთან”.

რუსეთის ეკლესიამ ეს გადაწყვეტილება კონსტანტინეპოლის საპატრიარქოს მიერ უკრაინის ეკლესიის ავტოკეფალიის საკითხში მხარდაჭერის შემდეგ მიიღო. რუსეთის ეკლესიას უკვე შეწყვეტილი ჰქონდა მსოფლიო პატრიარქის ლოცვებში მოხსენიება.

კონსტანტინეპოლის მსოფლიო საპატრიარქომ უკრაინის ეკლესიისათვის ავტოკეფალიას მისანიჭებლად შესაბამისი პროცედურები უკვე დაიწყო.


კონსტანტინოპოლის ეკუმენური საპატრიარქოს სინოდმა უკრაინასთან დაკავშირებით სხვა არაერთი საინტერესო გადაწყვეტილებაც მიიღო. სინოდმა დააკმაყოფილა კიევის პატრიარქ ფილარეტისა და უკრაინის კიდევ ერთი ავტონომიური ეკლესიის მეთაურის განცხადებები მათთვის კანონიკური სტატუსის აღდგენის შესახებ.

მსოფლიო საპატრიარქოს კიდევ ერთი გადაწყვეტილების თანახმად, უქმდება 1686 წელს “გარემოებებიდან გამომდინარე” მიღებული გადაწყვეტილება, რომლითაც მოსკოვის საპატრიარქოს ნება დართეს, კიევის სამიტროპოლია საკუთარ დაქვემდებარებაში მოექცია.

წყარო: რუსეთის საპატრიარქოს ვებგვერდი www.patriarchia.ru

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.