სუს-მა თურქეთის ორი მოქალაქე დააკავა ყალბი დოკუმენტების დამზადება-გასაღების ბრალდებით

სახელმწიფო უსაფრთხოების სამსახური აცხადებს, რომ მათმა ანტიკორუფციულმა სააგენტომ  ყალბი დოკუმენტის დამზადებისა და გასაღების ბრალდებით თურქეთის რესპუბლიკის ორი მოქალაქე დააკავა.

სუს-ის ცნობით, გამოძიებამ დაადგინა, რომ თალჰა ო-მ და ჰუსეინ ჩ-მ “სპეციალური ტექნიკური საშუალებების გამოყენებით, შემდგომი გასაღების მიზნით, დაამზადეს” საქართველოს ბინადრობისა და მართვის ყალბი მოწმობები და თურქეთის მოქალაქეს 1 600 აშშ დოლარად მიჰყიდეს.

გამოძიება დაიწყო სსკ-ის 19-180-ე მუხლის მე-2 ნაწილის „ბ“ ქვეპუნქტითა და 362-ე მუხლის 1-ლი ნაწილით, რაც სასჯელის სახით 4-დან 7 წლამდე თავისუფლების აღკვეთას ითვალისწინებს.

ორგანოს ცნობით, გამოძიებას აწარმოებს სახელმწიფო უსაფრთხოების სამსახურის ანტიკორუფციული სააგენტო.

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.