ზურაბ ჯაფარიძე “ქართუ” ბანკს მილიონიან სესხს სთხოვს

“გირჩის” საპრეზიდენტო კანდიდატი ზურაბ ჯაფარიძე ბიძინა ივანიშვილის დაფუძნებული “ქართუ” ბანკისგან კრედიტის სახით 1 000 000 ლარის მიღებას ითხოვს.

“გირჩმა” ამის შესახებ ინფორმაცია 10 ოქტომბრის საღამოს გაავრცელა.

1 ოქტომბერს “ქართუსგან” ამავე რაოდენობის სესხი მიიღო “ქართული ოცნების” მიერ მხარდაჭერილმა საპრეზიდენტო კანდიდატმა სალომე ზურაბიშვილმა.

“[ზურაბიშვილი] კანდიდატი არის, კანდიდატი ვარ, არჩევნებში იღებს მონაწილეობას, არჩევნებში ვიღებ მონაწილეობას. მილიონი მისცეს, მილიონი მომცენ”, — ამბობს კანდიდატი.

ჯაფარიძის ცნობითვე, ბანკი დაჰპირდა, რომ განიხილავენ მის თხოვნას.

საარჩევნო კოდექის 56-ე მუხლის გათვალისწინებით, თუკი კანდიდატი არჩევნებში ხმების 10%-ს ან მეტს დააგროვებს, მილიონ ლარს მიიღებს ორივე ტურში საარჩევნო კამპანიისათვის გაწეული ხარჯების დასაფარად.

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.