რეჟისორი ანდრეი ზვიაგინცევი თბილისში 22-24 ოქტომბერს ჩამოდის

რუსი რეჟისორი ანდრეი ზვიაგინცევი თბილისში ჩამოდის.

ზვიაგინცევი — როგორც ღონისძიების ორგანიზატორები აფასებენ, უახლესი კინოს ერთ-ერთი ყველაზე მნიშვნელოვანი და გავლენიანი კინორეჟისორი — თბილისში მასტერკლასს გამართავს.

რეჟისორი საქართველოს ეწვევა შოთა რუსთაველის თეატრისა და კინოს სახელმწიფო უნივერსიტეტის მიერ ორგანიზებული საგანმანათლებლო პროექტის, “თანამედროვე კინოს დიდოსტატების, ფარგლებში.

ღონისძიების აღწერის თანახმად, ზვიაგინცევის ხელწერა “გამოირჩევა, ერთი მხრივ, მწვავე სოციალურ-პოლიტიკური მესიჯებით, ხოლო, მეორე მხრივ, ღრმა და პოეტური ნარატივით”.

ზვიაგინცევის ფილმებს შორისაა “დაბრუნება“, “ელენა” , “ლევიათანი”  და მისი ბოლო სარეჟისორო ნამუშევარი “უსიყვარულო“.

ხელოვნებათმცოდნე და კინოკრიტიკოსი გოგი გვახარია ასე აფასებს ზვიაგინცევს: “კრიტიკოსები ხან ბერგმანს ადარებენ, ხან ტარკოვსკის, ხანაც დრაიერს და როსელინის. სინამდვილეში “ლევიათანის” შემდეგ ზვიაგინცევი სრულიად განთავისუფლდა გავლენებისგან და კინოში თავისი განუმეორებელი სტილი შექმნა”.

რეჟისორის მასტერკლასები 22-23 ოქტომბერს, 13:00 საათზე ჩატარდება თეატრისა და კინოს უნივერსიტეტში. 24 ოქტომბერს კი გაიმართება სარეჟისორო ვერსიის ჩვენება ფილმისა “უსიყვარულო”.

ნეტგაზეთის მასალების სხვა გამოცემებში გადაბეჭდვის წესი


ავტორი
ლუკა პერტაია მუშაობდა ნეტგაზეთის რეპორტიორად 2016 წლის მაისიდან 2017 წლის 31 იანვრამდე. 2017-18 წლებში მუშაობდა OC Media ში რეპორტიორად. 2018 წლის 1 სექტემბრიდან ის კვლავ ნეტგაზეთის რეპორტიორია.