ახალი ამბები

აშშ, ბრიტანეთი და ნიდერლანდები რუსეთს გლობალურ კიბერთავდასხმებში ადანაშაულებენ

4 ოქტომბერი, 2018 • 1979
აშშ, ბრიტანეთი და ნიდერლანდები რუსეთს გლობალურ კიბერთავდასხმებში ადანაშაულებენ

აშშ-ის იუსტიციის სამინისტრომ განაცხადა, რომ რუსეთის 7 მოქალაქე, რომლებიც ამავდროულად “გრუ”-ს აგენტები არიან, კიბერთავდასხმებთან არიან დაკავშირებული.

BBC-ის ინფორმაციით, აშშ-ის იუსტიციის სამინისტროში განაცხადეს, რომ კიბერშეტევების სამიზნე გახდა ქიმიური ლაბორატორიები, მათ შორის, შვეიცარიის ლაბორატორია, სადაც სკრიპალების მომწავლავი ნივთიერების კვლევა მიმდინარეობდა. კიბერშეტევების სხვა სამიზნეებს წარმოადგენდა ასევე სპორტული ორგანიზაციები- “ფიფა” და მსოფლიოს ანტიდოპინგური სააგენტო.

აშშ-ის იუსტიციის სამინისტროს ინფორმაციით, 7-დან 3 პირი ასევე ფიგურირებდა რუსეთის მიერ აშშ-ის არჩევნების სავარაუდო ჩარევის საქმეში, თუმცა უწყებაში აცხადებენ, რომ დღევანდელი ბრალდებები წინა გამოძიებასთან კავშირში არ არის.

აშშ-ის იუსტიციის სამინისტროს განცხადებას წინ უძღოდა ინფორმაცია იმის შესახებ, რომ ნიდერლანდების სპეცსამსახურებმა რუსეთის 4 მოქალაქის მიერ ჰააგაში მდებარე ქიმიური იარაღის აკრძალვის ორგანიზაციაზე ჰაკერული შეტევა აღკვეთეს. შემთხვევა, რომლის შესახებაც დღეს გახდა ცნობილი, 2017 წლის აპრილში მოხდა და ნიდერლანდების მხარის ინფორმაციით, ГРУ-ს მიერ იყო ორგანიზებული. ნიდერლანდებმა რუსეთის ოთხივე მოქალაქე ქვეყნიდან გააძევა.

უფრო ადრე გაერთიანებული სამეფოს მთავრობამ “გრუს” აგენტები დაადანაშაულა რუსეთსა და უკრაინაში არსებულ კომპანიებზე, აშშ-ის დემოკრატიულ პარტიაზე და ბრიტანეთის ერთ-ერთ მცირე ინტერნეტტელევიზიაზე განხორციელებულ კიბერთავდასხმებში.

გაერთიანებული სამეფოს პრემიერ-მინისტრის, ტერეზა მეისა და მისი ჰოლანდიელი კოლეგის, მარკ რუტეს ერთობლივ განცხადებაში ნათქვამია, რომ “გრუ უგულებელყოფს საერთაშორისო ფასეულობებს და წესებს, რომლებიც ყველას უსაფრთხოებას იცავს”.

მოსკოვმა ბრალდებები უარყო და “დასავლური ჯაშუშომანია” უწოდა.

მასალების გადაბეჭდვის წესი