თურქეთის დროშა და მტრედები. ფოტო: EPA/SEDAT SUNA

ლირის კრიზისის ფონზე, თურქეთი მოქალაქეობის მიღების პროცედურას ამარტივებს

უცხოელებისთვის თურქეთის მოქალაქეობის მიღება გამარტივდა. ლირის კრიზისის ფონზე, პრეზიდენტის ბრძანების მიხედვით, მოთხოვნები მნიშვნელოვნად შემცირდა საინვესტიციო და ფინანსურ ნაწილში, რომლებიც მოქალაქეობის მინიჭების კრიტერიუმებად განიხილება.

გამოცემა Hurriyet-ის ცნობით, მოქალაქეობის მსურველთათვის თურქეთში მქონე კაპიტალის ფიქსირებული ოდენობა ამ დრომდე შეადგენდა $2 მილიონს. ახალი კანონმდებლობით, თანხის რაოდენობა $500 000–მდე შემცირდა.

თურქეთის მოქალაქეობის მიღების კიდევ ერთი გზა ქვეყანაში $1 მილიონის ღირებულების უძრავი ქონების ფლობა იყო. 19 სექტემბრის ბრძანებით, ციფრი $250 000–მდე შემცირდა.

დამსაქმებელს, რომელსაც თურქეთის მოქალაქეობის მიღება სურს, აქამდე მინიმუმ 100 ადამიანი უნდა ჰყოლოდა დასაქმებული. ამიერიდან, ამისთვის 50 დასაქმებულიც საკმარისი იქნება.

$3 მილიონიდან $500 000–მდე დაეცა თურქეთის საბანკო ანგარიშებზე არსებული თანხის ლიმიტიც, რომელიც მოქალაქეობის მისაღებადაა საჭირო.

Reuters-ის ცნობით, ახალი რეგულაციებით, უცხოელს შეუძლია, თურქეთის მოქალაქეობის მისაღებად განაცხადი შეიტანოს, თუ ზემოთ ჩამოთვლილი კრიტერიუმებიდან ერთს მაინც აკმაყოფილებს.

თურქეთის მთავრობამ აღნიშნული ზომები ინვესტიციათა რაოდენობის გასაუმჯობესებლად, ლირის 40 %–იანი გაუფასურების ფონზე მიიღო. რთული ეკონომიკური ვითარებისა და აშშ–ის სანქციების ფონზე, ქვეყნის ეროვნული ვალუტა დოლარის მიმართ პერიოდულად ისევ უფასურდება.

 

ნეტგაზეთის მასალების სხვა გამოცემებში გადაბეჭდვის წესი


ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან