ნარკოტიკების საქართველოში შემოტანაში ბრალდებულს 15 წლით პატიმრობა მიესაჯა

დღეს, 13 აგვისტოს, რუსთავის საქალაქო სასამართლომ განსაკუთრებით დიდი ოდენობით ნარკოტიკული საშუალებების უკანონოდ შეძენა-შენახვასა და საქართველოში უკანონოდ შემოტანისთვის ბრალდებულ აზერბაიჯანის მოქალაქეს 15 წლით თავისუფლების აღკვეთა მიუსაჯა.

სასამართლომ სრულად გაიზიარა პროკურატურის მიერ წარდგენილი მტკიცებულებები და განსაკუთრებით დიდი ოდენობით ნარკოტიკული საშუალებების უკანონო შეძენა-შენახვისა და საქართველოში უკანონოდ შემოტანისთვის ბრალდებული, აზერბაიჯანის რესპუბლიკის მოქალაქე ი.ა. დამნაშავედ ცნო სისხლის სამართლის კოდექსის 260-ე მუხლის პირველი ნაწილით, მე-3 ნაწილის “ა” და მე-6 ნაწილის “ა” ქვეპუნქტებით და 262-ე მუხლის პირველი ნაწილით, მე-2 ნაწილის “ა” და მე-4 ნაწილის “ა” ქვეპუნქტით.

პროცესზე ბრალდების მხარის მიერ წარდგენილი მტკიცებულებების მიხედვით, აზერბაიჯანის რესპუბლიკის მოქალაქე ი.ა-მ აზერბაიჯანში უკანონოდ შეიძინა განსაკუთრებით დიდი ოდენობით ნარკოტიკული საშუალებები “მეთადონი”, “მეტამფეტამინი” და “ჰეროინი”, რომლებიც სხეულში დამალვის გზით, 2018 წლის 19 თებერვალს, სასაზღვრო-გამშვები პუნქტის “წითელი ხიდის” გავლით, უკანონოდ შემოიტანა საქართველოში.

პროკურატურის ინფორმაციით, სამართალდამცავებმა ი.ა საქართველოში შემოსვლისთანავე, სასაზღვრო-გამშვებ პუნქტ “წითელ ხიდში” დააკავეს:

“მისი პირადი ჩხრეკისას ამოღებულ იქნა 0,386 გრ. ნარკოტიკული საშუალება “მეთადონი” (მარილი), დიდი ოდენობის 0,5811 გრ. ნარკოტიკული საშუალება ,”მეტამფეტამინი” (მარილი) და განსაკუთრებით დიდი ოდენობის 6,2437 გრ. ნარკოტიკული საშუალება “ჰეროინი”. ი.ა.-ს ბრალდება სისხლის სამართლის კოდექსის 260-ე მუხლის პირველი ნაწილით, მე-3 ნაწილის “ა” და მე-6 ნაწილის “ა” ქვეპუნქტებით (ნარკოტიკული საშუალების უკანონო შეძენა- შენახვა, ჩადენილი განსაკუთრებით დიდი ოდენობით) და 262-ე მუხლის პირველი ნაწილით, მე-2 ნაწილის “ა” და მე-4 ნაწილის, “ა” ქვეპუნქტით (საქართველოში ნარკოტიკული საშუალების უკანონოდ შემოტანა, ჩადენილი განსაკუთრებით დიდი ოდენობით) წარედგინა და აღკვეთის ღონისძიების სახით პატიმრობა შეეფარდა.”

ნეტგაზეთის მასალების სხვა გამოცემებში გადაბეჭდვის წესი


ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.