დეკანოზი მამალაძე: შემომთავაზეს, თუ გავჩუმდები და ქვეყანას დავტოვებ, გამათავისუფლებდნენ

ე.წ. ციანიდის საქმეზე მსჯავრდებული დეკანოზი გიორგი მამალძე აცხადებს, რომ მას დუმილისა და ქვეყნის დატოვების სანაცვლოდ, პატიმრობიდან გათავისუფლება შესთავაზეს.

დაკავებულმა დეკანოზმა “კურიერისთვის” მიცემულ ინტერვიუში ქორეპოსკოპოს იაკობის 2 აგვისტოს გაკეთებულ განცხადებაზეც ისაუბრა. მისი თქმით, ამ განცხადებით კარგად ჩანს, რომ დეკანოზი პატიმრობაში დარჩება თუ არა, ქორეპოსკოპოს იაკობზეა დამოკიდებული:

“მეუფე იაკობის განცხადებები, მიანიშნებს რომ ჩემი პატიმრობა თუ არ პატიმრობა მეუფე იაკობის კეთილ ნებაზეა დამოკიდებული. მაგრამ ეს დიდხანს არ გაგრძელდება. მეუფე იაკობის გუშინდელი განცხადება ნაწილობრივ მიანიშნებდა იმაზე, რომ ის შეშინებულია და არ სურს ჩემი გამოსვლა. “რუსთავი 2-ის” ეთერში ვაშინგტონიდან მან განაცხადა, რომ ის თანახმაა მოხდეს ჩემი შეწყალება ოღონდ მე არ უნდა ვისაუბრო.

მეტს გეტყვით, შემომთავაზეს, თუ გავჩუმდები და ქვეყანას დავტოვებ, მე გამათავისუფლებენ. შეწყალება იქნებოდა, თუ როგორ მოხდებოდა ეს, ამას მნიშვნელობა არ აქვს. ასე ვთქვათ, მოხდებოდა ჩემი საპყრობილედან გათავისუფლება იმის სანაცვლოდ, რომ მე დუმილი შემენარჩუნებინა და დროებით მაინც დამეტოვებინა საქართველო” – ამბობს დეკანოზი “კურიერთან”.

დეკანოზის თქმით, მისთვის ეს შეთავაზება მიუღებელია და გაჩუმებას არ გეგმავს.

2 აგვისტოს ჟურნალისტების კითხვების საპასუხოდ, ქორეპისკოპოსმა იაკობმა განაცხადა, რომ ეკლესიაში რომ სჯეროდეთ დეკანოზ გიორგი მამალაძის უდანაშაულობის, ციხიდან თავად გმაოიყვანდნენ:

“ეკლესიას რომ გვჯეროდეს, რომ [დეკანოზი გიორგი მამალაძე] უდანაშულოა, ჩვენ გამოვიყვანდით აქამდე. მატყუარა ადამიანია, რა უნდა ვთქვა. ვინც მას ვიცნობთ და ვინც ვიცით რას აკეთებდა, ჩვენ არ შევალთ [მის მოსანახულებლად]” – ამბობს ქორეპისკოპოსი ჟურნალისტებთან საუბრისას.


  • დეკანოზ მამალაძეს თბილისის საქალაქო სასამართლომ 9-წლიანი პატიმრობა 2017 წლის 5 სექტემბერს მიუსაჯა. მას ბრალად პატრიარქ ილია მეორის მდივან–რეფერენტის მკვლელობის მომზადება ედებოდა.
  • დეკანოზი გიორგი მამალაძე საქართველოს პროკურატურამ 10 თებერვალს დააკავა თბილისის საერთაშორისო აეროპორტში, როდესაც ის ბერლინში მიემგზავრებოდა, სადაც საქართველოს მართლმადიდებელი ეკლესიის პატრიარქს, ილია მეორეს ოპერაცია უტარდებოდა. პროკურატურის ცნობით, დეკანოზის ბარგის ჩხრეკისას ამოიღეს ფარულად შენახული შხამიანი ნივთიერება -„ნატრიუმის ციანიდი“.
  • პროკურატურის ცნობით, ამ საქმეზე გამოძიება 2017 წლის 2 თებერვალს დაიწყო ჟურნალისტ ირაკლი მამალაძის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების – ციანიდის მოძიებაში დახმარება, რომლის გამოყენებითაც ამ უკანასკნელს, როგორც შეხვედრისას განმცხადებელმა გაარკვია, უნდა მოეხდინა მაღალი იერარქიის სასულიერო პირის სიცოცხლის ხელყოფა.
  • მოგვიანებით პროკურატურამ განმარტა, რომ დეკანოზი გიორგი მამალაძე აპირებდა შორენა თეთრუაშვილის მკვლელობას.
  • 2017 წლის 12 თებერვალს საქართველოს პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით შეეფარდა პატიმრობა.
  • მამალაძე თავდაპირველად ბრალდებული იყო საქართველოს სისხლის სამართლის კოდექსის 18-108-ე (მკვლელობის მომზადება) და 236-ე მუხლებით (ცეცხლასასროლი იარაღის უკანონო შეძენა-შენახვა), რაც სასჯელის სახედ და ზომად ითვალისწინებდა თავისუფლების აღკვეთას ვადით შვიდიდან თხუთმეტ წლამდე. მოგვიანებით, პროკურატურამ მამალაძეს ბრალი დაუმძიმა, კერძოდ, სსკ-ის 18, 109-ე მუხლის მე-3 ნაწილის „გ“ ქვეპუნქტით წარუდგინა ბრალდება (განზრახ მკვლელობის მომზადება ანგარებით), რაც სასჯელის სახედ და ზომად ითვალისწინებდა 16-დან 20 წლამდე თავისუფლების აღკვეთას.
  • საბოლოოდ სასამართლომ ისევ გადააკვალიფიცირა მუხლი 18-108-ზე და სწორედ მკვლელობის მომზადებაში ცნო დეკანოზი დამნაშავედ.
  • თავად დეკანოზი მამალაძე ბრალს არ აღიარებს, მისი თქმით, ციანიდის ყიდვა თავად შორენა თეთრუაშვილმა სთხოვა.
  • დეკანოზ მამალაძის საქმის სასამართლო განხილვა დახურული იყო, ასევე, ადვოკატებს გაუთქმელობის ხელწერილზე აქვთ ხელი მოწერილი, რის გამოც საზოგადოებისთვის უცნობია საქმის მასალები.
ნეტგაზეთის მასალების სხვა გამოცემებში გადაბეჭდვის წესი


ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.