ახალი ამბები

ქრთამის აღების ბრალდებით შემოსავლების სამსახურის თანამშრომელი დააკავეს

16 ივლისი, 2018 • 1666
ქრთამის აღების ბრალდებით შემოსავლების სამსახურის თანამშრომელი დააკავეს

საქართველოს ფინანსთა სამინისტროს საგამოძიებო სამსახურმა ქრთამის აღების ბრალდებით დააკავა  შემოსავლების სამსახურის მონიტორინგის დეპარტამენტის მონიტორინგის სამმართველოს აღმოსავლეთ განყოფილების უფროსი ოფიცერი.

საგამოძიებო სამსახურის განცხადებით, ბრალდებული, რომლის ფუნქციებში შედიოდა სატრანსპორტო საშუალებების შეჩერების, მათი ვიზუალური დათვალიერების და საქონლის თანმხლები საბუთების გადამოწმების გზით საქონლის დოკუმენტების გარეშე ტრანსპორტირების ფაქტების გამოვლენა და აღკვეთა, არაკანონიერი მატერიალური სარგებლის მიღების მიზნით, სამსახურებრივი მოვალეობების შესრულებისას ერთ-ერთ მოქალაქეს მფარველობას დაჰპირდა.

ფინანსთა სამინისტროს საგმაოძიებო სამსახურის განცხადებით, ბრალდებულმა პირს მიაწოდა ინფორმაცია იმის შესახებ, თუ ქალაქ თბილისის გარკვეულ უბანში დღე – ღამის რა მონაკვეთში არ ხორციელდებოდა კონტროლი მონიტორინგის დეპარტამენტის თანამშრომლების მიერ, რაც საშუალებას მისცემდა უპრობლემოდ მოეხდინა საქონლის ტრანსპორტირება შესაბამისი დოკუმენტაციის გარეშე.

“აღნიშნული დახმარების სანაცვლოდ, ბრალდებულმა მოქალაქეს ქრთამის სახით 500 ლარი გამოართვა. გამოძიება მიმდინარეობს საქართველოს სისხლის სამართლის კოდექსის 338-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 6-დან 9-წლამდე ვადით” – ამბობენ საგამოძიებო სამსახურში.

მასალების გადაბეჭდვის წესი